༄༅། །འཁྲུངས་སྐར་གྱི་ཚོར་སྣང་དང་ཁ་བཏགས་དཀར་པོའི་འོད་སྣང།

    སྤྱི་ཟླ་བདུན་པའི་ཚེས་དྲུག དེ་རིང་བོད་གཞིས་བྱེས་གཉིས་དང། རྒྱལ་ཁབ་མང་པོ་ཞིག་གི་ནང། ཐ་ན་ང་ཚོའི་བོད་མི་གཅིག་རེ་ལས་མེད་སའི་ས་ཆ་གང་ཞིག་ན་ཡང་རང་ཉིད་ཀྱི་སེམས་པ་དཀར་པོ་དེ་ཁ་བཏགས་དཀར་པོ་ཞིག་གིས་དྲངས་ཏེ་༧གོང་ས་མཆོག་གི་སྐུ་པར་ལ་སྒྲོན་གྱིན་ལོས་ཡོད། ཁོ་ཚོས་སྨོན་ཚིག་ཉག་གཅིག་སྒྲོག་གི་ཡོད་པ་དེ་ཡང། ༧གོང་ས་༧སྐྱབས་མགོན་༧རྒྱལ་བ་བསྟན་འཛིན་རྒྱ་མཚོའི་ཞབས་པད་བསྐལ་བརྒྱར་བརྟན་པར་ཤོག ཅེས་པ་འདི་རང་ཡིན་ངེས་ལ། དེ་ལྟར་ཡིན་པར་སྨོན།
    འཁྲུངས་སྐར། བཀྲ་ཤིས་པའི་ཉི་མ་འདི་ལོ་རེར་ཐེངས་རེར། ལོ་ངོ་རེ་བདུན་འགྱངས། ཉུང་ངུ་ཞིག་མིན་ན་ཡང། ང་ཚོར་ཧ་ཅང་ཉུང་ངུ་ཞིག་གི་ཚོར་སྣང་ཡོད། ང་ཚོ་ཉི་མ་འདི་ལ་ཅི་འདྲ་ཞིག་དགའ་ཨང། ཡིན་ན་ཡང་ང་ཚོར་ཉི་མ་འདི་འདྲ་ཅི་འདྲ་ཞིག་དཀོན་ཨང། དེའི་རྒྱུ་མཚན་ནི་ང་ཚོས་བཀྲ་ཤིས་པའི་ཉི་མ་འདི་གཅིག་པུ་ཕལ་ཆེ་བ་བཀྲ་མི་ཤིས་པའི་ལོ་རབས་དུ་མའི་ནང་དུ་རོལ་དགོས་བྱུང་ལ། ཐ་ན་བཀྲ་ཤིས་པའི་ཉིན་འདིའི་འཛུམ་མདངས་ཨུ་ཚུགས་ཀྱིས་སྟོན་དགོས་པའི་དུས་ཀྱང་སླེབས་ཡོད། སྔོན་ཆད་དང་ད་ལྟར་ཡང
    གྲོགས་པོ་ཚོ། ཁྱེད་ཅག་གི་སྐྱེས་སྐར་ཉིན་ལ་ཁྱེད་རང་གི་འཛུམ་མདངས་དེ་ཁྱེད་རང་གི་སྐྱེས་སྐར་བསུ་བའི་གྲོགས་པོ་སུ་ཞིག་གི་དགའ་འཛུམས་ལས་ཀྱང་ལྷག་ངེས། དེ་ལོས་ཡིན་ཁྱེད་རང་གི་སྐྱེས་སྐར་ཡིན་པས། འོན་ཀྱང་ང་ཚོའི་༧གོང་ས་མཆོག་ནི། རང་གི་འཁྲུངས་སྐར་ཉིན་ལ་ཕྱི་རྒྱལ་བའི་མི་ཆེན་དེ་དག་དང་འདྲ་བར་དགའ་སྤྲོར་རོལ་བ་ཁྱེད་ཚོས་མཐོང་མྱོང་ངམ། ཁོང་གིས་ཁྱེད་རང་ལྟར་རང་ཉིད་ཀྱི་འཁྲུངས་སྐར་ལ་རང་ཉིད་ཀྱི་དགྱེས་འཛུམ་མི་སྟོན་པ་ཅི་ཡིན་ནམ། འོ་ན་ང་ཚོ་ལ་བཀྲ་ཤིས་པའི་ཉི་མ་གཅིག་ཡོད་པ་འདི་ཡང། ཁོང་ལ་དེ་ལྟར་མིན་པ་ཡིན་ནམ། དེ་ཡང་༡༩༥༠ལོ་ནས་བཟུང། ལྷག་པར་མི་ཡུལ་འདིར་སླེབས་པའི་དུས་དེ་ནས་བཟུང། ཁོང་གི་ཞལ་ལས་འཛུམ་མུལ་གྱི་འོད་སྣང་སྤྲོ་ན་ཡང་ཁོང་གི་ཐུགས་ལ་སྐྱོ་གདུང་གི་མུན་པ་ཅི་འདྲ་མཐུག་པ་ས྄ུས་རྟོགས།
    ང་ཚོས་གང་ལྟར་ཡང། ཉིན་འདིར་གཟབ་འཕྱོར་སྤྲོས་ཏེ་གཙུག་ལག་ཁང་འདིར་ངང་གིས་འདུས་ནས། བཀྲ་ཤིས་བདེ་ལེགས་གྲངས་མེད་ཀྱི་ཁ་དར་དཀར་པོ་གྲངས་མེད་ཅིག་དང་ལྷན། བཀྲ་ཤིས་པའི་གླུ་གར་གྱིས་ཁོང་ལ་རྟེན་འབྲེལ་ཞུས་ཤིང། རང་ཉིད་ལ་བསོད་ནམས་ཚོགས་གསོག་བཟང་པོའི་གོ་སྐབས་ཤིག་ཐོབ་སྙམ་པའི་དགའ་སྤྲོ་སྐྱེས།
    ཉིན་འདི་ནི་ཁོང་དང་ང་ཚོའི་ཆེས་དགའ་བ་འཕེལ་བའི་ཉིན་ཞིག་ཡིན་ན་ཆོག་ལ་མིན་ནའང་ཆོག གང་ལྟར་ང་ཚོར་མཁོ་བ་ནི་ཉིན་འདི་རང་ཡིན། དེ་བས་བཀྲ་ཤིས་ཉི་མ་དྲུག་ཅུ་རྩ་བདུན་འདི་མང་པོ་ཞིག་གཏན་ནས་མིན། ང་ཚོ་ལ་ཉི་མ་འདི་ཁྲི་ཁྲི་འབུམ་འབུམ་དགོས། འོན་ཀྱང་དེ་ནི་མི་སྲིད་པ་ཞིག་རེད། ནམ་ཞིག་ལ་ང་ཚོས་༧ཁོང་གི་མྱ་ངན་གྱི་ཉི་མ་ནག་པོ་ཞིག་ངེས་པར་མཐོང་ངེས། ཅིས་ཀྱང་འབྱུང་ངེས། དེ་ལྟར་བསམས་ན་དེ་རིང་གི་ཉི་མ་འདིར་ཡང་ང་ཚོའི་མིག་མཐར་མཆི་མ་འཁྱིལ་ཞིང་ཁ་བཏགས་དཀར་པོའི་ཁ་དོག་རབ་རིབ་ཏུ་འགྱུར། ང་ཚོས་ངེས་པར་འདི་ལྟར་བསམ་དགོས། འདི་ལྟར་བསམ་ན་ང་ཚོའི་དེ་རིང་གི་ཉི་མའི་རིན་ཐང་རྟོགས་ཤིང། ང་ཚོས་སང་ཉིན་གྱི་ཉི་མའི་ལས་སྐལ་ཡང་ཤེས་ཐུབ། ངོ་མ་ང་ཚོར་ཅི་འདྲའི་ལས་སྐལ་མང་པོ་ཞིག་གིས་སྒུག་ཡོད་ཨང། དེ་དག་ལས་གཞིས་བྱེས་མཉམ་འཛོམས་ཀྱི་རང་དབང་དགའ་སྟོན་ཞིག་རོལ་རྒྱུ་དེ་ནི་ང་ཚོའི་རེ་སྒུག་གི་བཀྲ་ཤིས་ཉི་མ་དང་པོ་དེ་ཡིན། དེ་དུས་ནས་ཉི་མ་ཚང་མ་ང་ཚོའི་བཀྲ་ཤིས་པའི་འཁྲུངས་སྐར་དང་འདྲ།
    ང་ཚོས་བཀྲ་མི་ཤིས་པའི་ལོ་ཟླ་ནག་པོ་ཞིག་གི་ཁྲོད་ནས་བཀྲ་ཤིས་པའི་གསེར་མདོག་གི་ཉིན་མོ་ཞིག་འཚོལ་རྒྱུ་དེ་ལས་སླ་བོ་ཞིག་གཏན་ནས་མིན། ཉི་མ་དེ་ངེས་པར་འཆར་དགོས་ན། ང་ཚོ་ཁོང་གི་གསུང་གི་ཉི་འོད་ལ་བསྟེན་ནས་སྐྱོད་དགོས། ཁོང་གིས་ད་བར་ཡང་དང་བསྐྱར་དུ་ནན་གྱིས་གསུང་གནང་བའི་ཆོས་སྲིད་ཀྱི་བཀའ་སློབ་ལམ་སྟོན་འོད་སྣང་བྱེ་བའི་མཛོད་ཁང་དེ་དག་ངེས་པར་ཀོླག་དགོས། ངེས་པར་བསམ་དགོས། ཅིས་ཀྱང་ལག་ལེན་བྱེད་དགོས། རང་གིས་ཅི་ཤེས་དང་སོ་སོས་གང་ཐུབ་པ་དེ་དག་ང་ཚོའི་ཉིན་རེའི་མི་ཚེའི་ནང་གི་ཟ་མ་ཇི་བཞིན་བཟའ་དགོས། ཆུ་བཞིན་དུ་བཏུང་དགོས། དེ་ནི་ང་ཚོའི་འགྲན་ཟླ་བྲལ་བའི་སྟོབས་ཤུགས་ཤིག་དང་རྒྱལ་ཁ་ཞིག་གི་འབྱུང་ཁུངས་ཡིན།
    འོ་ན། ང་ཚོས་དེ་རིང་གི་དགའ་ཚོར་ཅི་ཡོད་དང། སྐྱོ་གདུང་ཅི་ཡོད་ཚང་མ་ང་ཚོའི་སང་ཉིན་གྱི་བཀྲ་ཤིས་ཉི་མ་འདི་བསུ་བའི་སྟོབས་ཤུགས་སུ་བསྒྱུར་དགོས། དམ་ཚིག་ཆིག་སྒྲིལ་གྱི་སྟོབས་ཤུགས་ནི་ང་ཚོའི་རྒྱལ་ཁ་ཡིན་ལ། ང་ཚོས་ལོ་རྗེས་མའི་འཁྲུངས་སྐར་བསུ་བའི་ལེགས་སྐྱེས་ངོ་མ་ཡང་ཡིན། སྟོབས་ཤུགས་འདི་ཁྲི་ལོར་བརྟན་པར་ཤོག །

༢༠༠༢ ༦ ༢༢