༄།ལེགས་བཤད་འོ་མའི་ཐིགས་པ།

 

 

བཞོས་ནས་ཚར་བ་མེད་པ་ཡི། འདོད་འཇོའི་བ་ཡི་འོ་མ་བཞིན།

ཡོན་ཏན་བླངས་པས་མི་འཛད་པ། དགེ་བའི་བཤེས་རྣམས་དཔྲལ་བའི་མིག

 

འོ་མ་ཐུན་མོང་བཏུང་བ་སྟེ། ཡི་གེ་ཐུན་མོང་སློབ་སྦྱོང་ཡིན།

 

བ་འབྲི་ཁྱིམ་ཚང་སོ་སོའི་སྟེ། དགེ་རྒན་སྤྱི་ཚོགས་ཧྲིལ་བོའི་ཡིན།

 

སྒོ་ཕྱུགས་འོ་མ་ཀུན་གྱིས་བཞིན། དགེ་རྒན་ཡོན་ཏན་སུས་ཀྱང་ལེན།

 

འོ་ཆུ་འདྲེས་པ་དབྱེར་མེད་བཞིན། དགེ་སློབ་མཛའ་བརྩེ་གཅིག་ཏུ་འབྲེལ།

 

ཁ་སྦུབ་སྣོད་ལ་འོ་མ་ཇི་ལྟར་ལྡུག འདོད་པ་མེད་ལ་བཙན་བསྐུལ་བྱས་ཀྱང་ཅི།

 

ཞབས་རྡོལ་སྣོད་ལ་འོ་མ་བླུགས་ཀྱང་འཛད། དྲན་ཤེས་མེད་པས་སློབ་སྦྱོང་བྱས་ཀྱང་ཉམས།

 

མི་གཙང་སྣོད་ལ་འོ་མ་བླུགས་ན་རུལ། སྣོད་ལྡན་མིན་ལ་དམ་ཆོས་བསླབས་ཀྱང་ཉེས།

 

སྐྱོན་མེད་སྣོད་ལ་འོ་མ་ལྡུག་པ་བཞིན། སྐྱོན་མེད་སློབ་མར་སློབ་སྦྱོང་ལེགས་པོ་སྤྲོད།

 

མཐའ་དག་ཤེས་བྱ་བློ་ལྡན་བརྩོན་པས་ཏེ། གངས་སེང་འོ་མ་གསེར་གྱི་བུམ་པས་སྐྱོར།

 

འོ་མ་རུལ་ཡང་ཆུ་ཡི་རང་བཞིན་ཏེ། མཁས་པ་རྒུད་ཀྱང་ཤེས་རབ་རང་བཞིན་ཅན།

 

ཡོན་ཏན་ལེན་ཀྱང་དགེ་རྒན་མི་བཀུར་བ། འོ་མར་དགའ་ཡང་བ་མོར་མི་དགའ་བཞིན།

 

འོ་མ་མ་བསྐོལ་མྱུར་རུལ་བཞིན། བྱིས་དུས་མ་བཏུལ་ལང་ཤོར་འགྱུར།

 

འོ་མ་འཕྱུར་ན་འབོ་བ་བཞིན། ཁེངས་པ་འཕེལ་ན་སློབ་སྦྱོང་ཉམས།

ལང་ཚོ་འཕེལ་བས་འོ་མ་སྟེ། རིག་པ་འཕེལ་བས་ཡོན་ཏན་སྨིན།

 

འོ་མ་མ་འཐུང་བྱིས་པ་སུ། སློབ་སྦྱོང་མ་ཐོབ་རྒན་པོའང་མངས།

 

འབྲི་མོའི་འོ་མ་འཕྲོག་ནུས་ཀྱང། གཞན་གྱི་ཡོན་ཏན་དེ་ལྟར་མིན།

 

ཡོན་ཏན་ཅན་ལས་ཡོན་ཏན་ལེན། སུ་ཞིག་གཡག་ལས་འོ་མ་འཇོ།

 

འོ་མས་ཕྲུ་གུ་གསོ་བ་ལྟར། རིག་གནས་སློབ་གསོས་མི་རྣམས་གསོ།

 

མ་རུངས་སྐྱེ་བོ་ལེགས་བསྐྱངས་ཀྱང། སྦྲུལ་གདུག་འོ་མས་གསོས་པ་བཞིན།

 

ཞི་མི་འོ་མར་དགའ་བ་བཞིན། རིག་པའི་གནས་ལ་དགའ་བར་བྱ།

 

འོ་མ་དཀྲོགས་ན་མར་ལོ་སྟེ། ཤེས་བྱ་སྦྱངས་ན་ཡོན་ཏན་འབྱུང།

འོ་མ་མངར་ཡང་སྐྱུར་འགྱུར་བཞིན། ཡ་རབས་མ་རབས་འགྱུར་བ་ཡོད།

 

འོ་མའི་ཁ་དོག་འགྱུར་ཡང་སྲིད། དམ་པའི་བཟང་སྤྱོད་ནམ་ཡང་མིན།

 

འོ་མས་ཁ་ཟས་སྣ་ཚོགས་བཞིན། ཡོན་ཏན་ཚོགས་ཀྱིས་ཅི་ཡང་འགྲུབ།

 

བྱིས་པའི་སློབ་སྦྱོང་ཤོར་བ་ནི། བེ་འུའི་འོ་མ་འཕྲོག་ལས་ཐུ།

 

འོ་མ་དགོས་ན་བ་མོ་གསོ། སློབ་སྦྱོང་དགོས་ན་དགེ་རྒན་བསྟེན།

 

བ་མོའི་འོ་མ་ཟན་རྩྭས་ཏེ། དགེ་རྒན་ཡོན་ཏན་སློབ་གསོ་ལས།

 

འོ་མ་རྩི་ཤིང་བཅུད་ལས་ཏེ། རིག་པ་ཤེས་བྱའི་ཀློང་ལས་བརྡོལ།

 

ཤེས་བྱ་ཡོན་ཏན་མེད་པ་ནི། འོ་མ་མེད་པའི་འབྲི་སྐམ་བཞིན།

བ་མོ་མང་ན་འོ་མ་མང། དགེ་རྒན་མང་ན་ཤེས་ཡོན་འཛོམས།

 

བ་གཅིག་འོ་མས་མི་བཅུ་གསོ། དགེ་རྒན་གཅིག་གིས་སློབ་མ་བརྒྱ།

 

སྲོག་ཆགས་མི་འདྲའི་འོ་མ་བཞིན། ཤེས་བྱ་རིག་པར་རྣམ་གྲངས་མངས།

 

འོ་མ་གང་ལ་དགའ་བ་བཞིན། ཤེས་བྱ་གང་ལ་མོས་པ་སློབ།

 

ཨ་མའི་འོ་མ་བུ་ཕྲུག་དང༌། དགེ་རྒན་ཤེས་ཡོན་ཀུན་ལ་འགྱེད།

 

འོ་ཇ་ཞིམ་པོས་སྐོམ་སེལ་བཞིན། ཤེས་བྱ་རིག་པས་དཀའ་ངལ་སེལ།

 

བཟང་ངན་འདྲེས་པ་ཤེས་རབ་ཀྱིས། ཆུ་ལས་འོ་མ་ངང་པས་འབྱེད།

 

འོ་མ་སྐྱུར་ན་འཐུང་མཁན་དཀོན། ཤེས་རབ་འཆལ་ན་བཀུར་མཁན་དཀོན།

 

ངོ་མཚར་འོ་དཀྲོགས་འཕྲུལ་ཆས་ཀྱིས། མར་དང་དར་བ་འབྱེད་པ་བཞིན།

མི་ཡི་ངོ་མཚར་རྣམ་དཔྱོད་ཀྱིས། ཤེས་བྱ་ཀུན་གྱི་བྱེ་བྲག་འབྱེད།

 

སློབ་གྲྭའི་ནེའུགསེང་དགའ་ཚལ་ནས། རིག་པའི་བ་འབྲི་མངས་བསྐྱངས་ཏེ།

རྩོམ་རིག་འོ་མའི་ཟས་སྣ་བརྒྱས། རྩམ་གཟན་མགྲོན་བརྒྱའི་ལྟོགས་སྐོམ་སེལ།

 

ཡོན་ཏན་འོ་མའི་མཛོད་འཛིན་པའི།མཁྱེན་བརྩེའི་བདག་ཉིད་མཛོ་མོ་བརྒྱས།

སློབ་གསོའི་རྩྭ་ཐང་ཡངས་པོ་རུ། སློབ་བུའི་བེའུ་སྟོང་གསོ་བར་སྨོན། །

 

 ཞེས་དགེ་སློབ་རྣམས་ལ་གདམས་པའི་ལེགས་བཤད་འོ་མའི་ཐིགས་པ་ཞེས་པའི་བསྟན་བཅོས་རེ་ཞིག་རྫོགས་སོ།། །།