༄༅། །བོད་དོན་གལ་ཆེའི་ཞལ་འདོན་ཁག་བཞུགས་སོ།།

        ཕྱག་ན་པད་མོར་དད་གུས་དང་བོད་དོན་གཅེས་སུ་འཛིན་པའི་བོད་འབངས་ཚང་མས་ཞལ་འདོན་འདི་དག་ཉིན་བཞིན་ཚར་གསུམ་འདོན་རྒྱུར་དམ་བཅའ་རྒྱུ་འདི་ཡང་ཆོས་སྲིད་ཟུང་འབྲེལ་གྱི་བགྱི་བ་ཤིན་ཏུ་དགེ་བ་ཞིག་ལེགས་པ་ཡིད་འཇགས་འཚལ།

          ༄༅། །ན་མོ་རཏྣཏྲ་ཡཱ་ཡ། ཚད་མེད་ཡོན་ཏན་རྒྱ་མཚོའི་དཔལ་མངའ་ཞིང། །ཉམ་ཆུང་འགྲོ་ལ་བུ་གཅིག་ལྟར་དགོངས་པའི། །དུས་གསུམ་བདེ་གཤེགས་སྲས་དང་སློབ་མར་བཅས། །བདག་གི་བདེན་པའི་སྨྲེ་ངག་འདིར་དགོངས་ཤིག །སྲིད་ཞིའི་གདུང་སེལ་ཡོངས་རྫོགས་ཐུབ་པའི་བསྟན། འཛམ་གླིང་ཡངས་པའི་ཕན་བདེའི་དཔལ་དུ་རྒྱས། །དེ་འཛིན་མཁས་དང་གྲུབ་པའི་སྐྱེས་བུ་རྣམས། །ཆོས་སྤྱོད་རྣམ་བཅུའི་བྱ་བ་འཕེལ་བར་མཛོད། །མི་བཟད་ལས་ངན་དྲག་པོས་ཡོངས་ནོན་པས། །བར་མེད་དུཿཁས་མནར་བའི་ཉམ་ཐག་འགྲོ །བཟོད་དཀའི་ནད་མཚོན་མུ་གེའི་འཇིགས་པ་ཀུན། ཞི་ནས་བདེ་དགའ་རྒྱ་མཚོར་དབུགས་དབྱུངས་མཛོད། །ཁྱད་པར་གངས་ལྗོངས་ཆོས་ལྡན་སྐྱེ་འགྲོ་རྣམས། །ནག་ཕྱོགས་ཀླ་ཀློའི་དཔུང་གིས་བརྩེ་མེད་དུ། །ངན་དགུས་འཇོམས་པའི་ཁྲག་དང་མཆི་མའི་རྒྱུན། །མྱུར་དུ་ཆད་པའི་ཐུགས་རྗེའི་མཐུ་དཔུང་སྐྱེད། །ཉོན་མོངས་གདོན་གྱིས་སྨྱོས་པའི་བརླང་སྤྱོད་ཀྱིས། །རང་གཞན་གཉིས་འཕུང་བགྱིད་པའི་སྙིང་རྗེའི་ཡུལ། །མི་བསྲུན་སྐྱེ་བོའི་ཚོགས་རྣམས་བླང་དོར་མིག །ཡོངས་ཐོབ་བྱམས་བརྩེ་མཛའ་བའི་དཔལ་ལ་སྦྱོར། །རིང་ནས་སྙིང་དུ་བརྣག་པའི་འདོད་པའི་དོན། །ཡོངས་རྫོགས་བོད་ལྗོངས་རང་དབང་གཙང་མའི་དཔལ། །ལྷུན་གྲུབ་ཆོས་སྲིད་ཟུང་འབྲེལ་དགའ་སྟོན་ལ། །སྤྱོད་པའི་དགའ་སྟོན་མྱུར་བ་མྱུར་དུ་སྩོལ། །བསྟན་དང་དེ་འཛིན་ཆབ་སྲིད་རང་རིགས་སླད། །གཅེས་པའི་ལུས་སྲོག་ལོངས་སྤྱོད་ཡོངས་བཏང་སྟེ། །དཀའ་བ་བརྒྱ་ཕྲག་བསྒྲུབས་པའི་སྐྱེ་བོ་རྣམས། །གྲུ་འཛིན་མགོན་དེས་ཐུགས་རྗེས་སྐྱོང་བར་མཛོད། །མདོར་ན་བགོན་པོ་སྤྱན་རས་གཟིགས་དབང་གིས། །སྲས་བཅས་རྒྱལ་བའི་སྤྱན་སྔར་གངས་ཅན་ཞིང། །ཡོངས་བཟུང་རྒྱ་ཆེན་སྨོན་ལམ་གང་མཛད་པའི། །འབྲས་བཟང་དེང་འདིར་མྱུར་དུ་འཆར་བར་གསོལ། །སྣང་སྟོང་ཆོས་ཉིད་ཟབ་མོའི་རྟེན་འབྲེལ་དང། །མཆོག་གསུམ་ཐུགས་རྗེའི་མཐུ་དང་བདེན་ཚིག་སྟོབས། །ལས་འབྲས་བསླུ་མེད་བདེན་མཐུས་བདག་ཅག་གི །བདེན་པའི་སྨོན་ལམ་གེགས་མེད་མྱུར་འགྲུབ་ཤོག། །། རབ་རྒྱལ་ལྕགས་བྱི་ཟླ་༨ཚེས་༩།(1960)

          ༄༅། །འགྲོ་ལ་ཕན་བཞེད་ཐུགས་རྗེ་གོམས་པ་ལས། །གཅིག་ཏུ་དགེ་བ་རྗེས་བསྟན་ཆོ་འཕྲུལ་གྱིས། །ཞི་བསིལ་ཕན་བདེའི་འདོད་དོན་སྒྲུབ་མཁས་པ། །རྣམ་འདྲེན་སྟོབས་བཅུ་མངའ་བས་དུས་ཀུན་སྐྱོངས། །བདེ་སྡུག་འདོད་དང་མི་འདོད་རང་གཞན་ཀུན། །མཉམ་ཉིད་བདག་བས་གཞན་རྣམས་གཙོ་བའི་ཕྱིར། །གཞན་ཕན་བདེ་ལ་འགོད་པའི་བྱང་ཆུབ་སེམས། །མཁའ་ཁྱབ་སྐྱེ་དགུའི་སྙིང་ལ་འཇུག་པར་ཤོག །དེའི་མཐུས་གྲོགས་དག་བྱམས་དང་བརྩེ་བ་ཡིས། །ཉེ་བར་བཟུང་ནས་ཞི་སྙོམས་བདེན་པའི་ལམ། །ཀུན་དགའ་བདེ་བ་སྟེར་བའི་དཔལ་བཟང་པོར། །ཅི་དགར་སྤྱོད་པའི་དུས་ཀྱིས་འདའ་བར་ཤོག །གང་གི་མཚན་ཡང་རྒྱལ་བས་བྱིན་བརླབས་པའི། །དམན་ལ་ལྷག་པར་བརྩེ་བ་ཐུགས་རྗེའི་གཏེར། །ཁྱོད་ཉིད་དྲན་པའི་མོས་གུས་གདུངས་དབྱངས་ཀྱིས། །ཉེ་བར་བསྐུལ་ན་དུས་ཀུན་རྗེས་འཛིན་མཛོད། །ཐུབ་པའི་ལུང་གིས་བསྔགས་པའི་གངས་ལྗོངས་ཀྱི། །རྣམ་གསུམ་མེས་དབོན་དམ་པའི་རྗེས་ཞུགས་པ། །རང་རིགས་སྐྱེ་དགུའི་དད་དམ་བྱིན་མཐུ་ཡིས། །འཕྲལ་ཡུན་འདོད་དོན་ལྷུན་གྱིས་འགྲུབ་པར་མཛོད། །ཚེ་རབས་ཀུན་ཏུ་བྱང་ཆུབ་སེམས་མཆོག་དང། །ཡང་དག་ལྟ་ལ་གོམས་པར་བྱས་པ་ལས། །དུག་གསུམ་བག་ཆགས་འབྲས་བུར་བཅས་ཞི་ནས། །བྱང་ཆེན་གཏན་བདེའི་ས་ལ་མྱུར་རེག་མཛོད། །ལྟོས་ནས་གྲུབ་པའི་རྟེན་འབྱུང་སྒྱུ་མའི་གཤིས། །ནམ་ཡང་བསླུ་མེད་ཆོས་ཉིད་བདེན་པ་དང། །ལྷག་བསམ་དཀར་བའི་བདེན་པའི་སྟོབས་དག་གིས། །སྨོན་པའི་དོན་རྣམས་བདེ་བླག་འགྲུབ་གྱུར་ཅིག། །། རབ་རྒྱལ་ལྕགས་སྤྲེལ་ཟླ་༤ཚེས་༡།(1980)

          ༄༅། །མཐའ་བྲལ་དོན་དམ་འོད་གསལ་གཉུག་མའི་གཤིས། །ལྷུན་གྲུབ་མཚན་དཔེའི་གཟི་འབར་ལོངས་སྤྱོད་རྫོགས། །འགྲོ་ཁམས་ཇི་བཞིན་སྣ་ཚོགས་སྤྲུལ་བའི་སྐུ། །ཐུབ་དབང་ཐུགས་རྗེ་རྒྱ་མཚོས་དུས་ཀུན་སྐྱོངས། །རྒྱལ་ཀུན་མཁྱེན་བརྩེ་ནུས་པའི་སྒྱུ་འཕྲུལ་གར། །པུར་རྒྱལ་བོད་ཀྱི་འགྲོ་བའི་དཔལ་ཤར་བ། །གྲུབ་མཆོག་མཚོ་སྐྱེས་དྲིན་པོ་ཆེ། །དེང་འདིར་གདུང་བས་བསྐུལ་ལོ་ཐུགས་རྗེས་ཟུངས། །སྤངས་རྟོགས་མཐར་ཕྱིན་སྐུ་ལྔའི་བདག་ཉིད་ཀུན། །མཉམ་ཉིད་ཉེ་རིང་གཟིགས་པ་མི་མངའ་ཡང། །གདུལ་བྱའི་ཁམས་སོགས་རྟེན་འབྲེལ་མཐུ་བཙན་པས། །ཁྱོད་ནི་གངས་ངས་འགྲོ་བའི་མགོན་དཔུང་ཉིད། །ལྷག་པར་ཁྲི་སྲོང་ལྡེའུ་བཙན་ཡབ་སྲས་ཀྱིས། །བོད་ཁམས་ཐུགས་རྗེས་འཛིན་པར་བསྐུལ་བའི་ཚེ། །འགྱུར་མེད་ཞལ་བཞེས་མཛད་པ་དོན་གནས་ན། །དུས་འདིར་ཁྱོད་ཀྱིས་ཐུགས་རྗེས་སྐྱོང་བར་གསོལ། །ཕོངས་ཤིང་དོན་མེད་བཀོལ་སྤྱོད་གདུང་བས་མནར། །སྙད་སྡང་སྲོག་ལ་འཇིགས་པའི་དངངས་སྐྲག་གིས། །གཤིན་རྗེའི་གྲོང་ཁྱེར་ལྟ་བུར་གྱུར་བ་ཡི། །ཆོས་ལྡན་གངས་ཅན་པ་རྣམས་ཅི་ཡིས་ནོངས། །འོན་ཏེ་སྔོན་བསགས་དཀར་མིན་ལས་ཀྱི་འབྲས། །བརྣག་དཀའི་དུཿཁ་བཅུ་ཕྲག་ཟུང་ལྷག་ལོར། །མྱངས་པའི་ཉམ་ཐག་ངང་ཚུལ་འདི་བས་ན། །ལྷག་པར་དགོངས་ཤིག་བརྩེ་ཆེན་ཐུགས་རྗེའི་གཏེར། །ཨེ་མ་དཀར་མིན་ལས་ཀྱི་མཐུ་བཙན་མོད། །དད་དང་འདུན་སྟོབས་ལྷག་བསམ་བྱིན་མཐུ་ཡང། །སྟོབས་དང་ལྡན་ཕྱིར་དགེ་འབྲས་འདོད་རྒུའི་ཚོགས། །མྱུར་དུ་སྨིན་པའི་རྟེན་འབྲེལ་མཐུ་འགྲུབ་མཛོད། །བླ་མ་མཆོག་གསུམ་བོད་སྐྱོང་དམ་ཅན་དང། །གངས་ཅན་སྐྱེ་དགུའི་དད་དམ་བྱིན་མཐུའི་སྟོབས། །སྣང་སྟོང་རྒྱུ་འབྲས་མི་བསླུ་བདེན་སྟོབས་ཀྱིས། །།སྨོན་པའི་དོན་རྣམས་མྱུར་དུ་འགྲུབ་པར་ཤོག། །།རབ་རྒྱལ་ལྕགས་སྤྲེལ་ཟླ་༡༠ཚེས་༡༥།

          ༄༅། །བྷྱོ ཀུན་ཁྱབ་སྤྲོས་བྲལ་བདེ་བ་ཆེན་པོའི་དབྱིངས། །གང་འདུལ་ཁྲོ་ཆགས་མ་ངེས་རྣམ་འགྱུར་གྱིས། །སྣང་སྲིད་འཁོར་འདས་ཀུན་ལ་དབང་བསྒྱུར་བའི། །མ་གཅིག་སྲིད་གསུམ་རྒྱལ་མོ་དེང་འདིར་དགོངས། །གཞན་གྱིས་བྱ་དཀའ་རྒྱལ་སྲས་སྤྱོད། །བགྲང་ཡས་བསྐལ་པར་བསྟེན་ཅིང་གོམས་པ་ལས། །བྱང་ཆུབ་རྡོ་རྗེའི་དཔལ་ལ་དབང་འབྱོར་ཏེ། །གཟིགས་པ་དུས་ལས་མི་ཡོལ་བརྩེ་ཆེན་མ། །ཀུན་རྟོག་དྲི་བཞོན་རྒྱུ་བ་དབྱིངས་སུ་ཐིམ། །བརྟན་གཡོ་ཀུན་བྱེད་སེམས་ཀྱི་རྡོ་རྗེའི་གར། །སྲིད་ཞིའི་འདོད་རྒུ་འཇོ་བའི་གཉེན་གཅིག་ཏུ། །མ་ལུས་རྒྱལ་བས་ཡོངས་བསྔགས་བཅོམ་ལྡན་མ། །རྣམ་བཞིའི་འཕྲིན་ལས་གློག་ལྟར་འགྱུ་བ་ཡིས། །བསྟན་དང་བསྟན་འཛིན་སྐྱོང་ལ་ཆེས་དཔའ་བས། །མཐུ་ལྡན་བསྟན་སྲུང་རྒྱུ་སྐར་ཕྲེང་བའི་དབུས། །ཉ་རྒྱས་ཟླ་བ་ཇི་བཞིན་མངོན་པར་འཕགས། །ཆེར་སྙིགས་དུས་ཀྱི་རྒུད་པའི་རང་བཞིན་ལས། །ཆགས་སྡང་གྱ་གྱུའི་ཐན་ལྟས་དཔུང་གི་ཚོགས། །ཆེས་ཆེར་ལྡང་ཚེ་གྲིབ་བྲལ་མཐུ་སྟོབས་ཀྱང། །རྣོ་མྱུར་འབྱམས་སུ་ཀླས་འདི་ཨེ་མ་ཧོ། །ལྷ་ཁྱོད་དུང་དུང་སྙིང་ནས་རྗེས་དྲན་ཅིང། །ཉམས་ཆག་བཤགས་ཤིང་དགྱེས་པ་ཀུན་བསྐངས་ཏེ། །ཆེ་བའི་ཆེ་མཆོག་སྲུང་མར་མངའ་གསོལ་ན། །མཐུ་རྩལ་མ་ཞན་བཅོལ་བའི་ལས་ཀུན་སྒྲུབས། །གྲུབ་མཆོག་མཚོ་སྐྱེས་རྡོ་རྗེས་བཀའ་བསྒོས་ཤིང། །ལས་སྨོན་སྟོབས་ཀྱིས་ཉེ་བར་འབྲེལ་བ་ཡི། །བོད་སྐྱོང་ལྷ་སྲུང་གཉན་པོ་འཁོར་བཅས་རྣམས། །དབུ་འཕང་བསྟོད་ཅིང་མཐུ་སྟོབས་རྒྱས་པར་མཛོད། །དགྲ་སྡེས་བཅོམ་པའི་བོད་ལྗོངས་སྐྱེ་འགྲོ་རྣམས། །མི་བཟད་དུཿཁས་མནར་ཡང་སྙིང་སྟོབས་གྱིས། །རང་དབང་དཔལ་ལ་རེ་བཞིན་རྟག་གནས་ན། །ཐུགས་རྗེའི་ཕྱག་གིས་གཏོང་བ་ཅང་ཕོད་དམ། །དེ་ཕྱིར་མ་རུངས་དགྲ་སྡེའི་གཤེད་མ་ཆེར། །མངོན་བཞེངས་དམག་དང་ཟོར་གྱི་ལས་མཛད་མ། །གདུང་བའི་དབྱངས་ཀྱིས་བསྐུལ་ལོ་ཌཱཀི་མ། །མཐུ་རྩལ་ནུས་པ་ཕྱུངས་པའི་དུས་ལ་བབས།། །།རབ་རྒྱལ་ཆུ་གླིང་ཟླ་༡ཚེས༡།(1973)

          ༄༅། །བདེ་གཤེགས་རིགས་ལྔའི་ཡེ་ཤེས་སྒྱུ་འཕྲུལ་གར། །བོད་ཁམས་སྐྱོང་མཛད་བསྟན་སྲུང་དྲེགས་པའི་གཙོ། །འཕྲིན་ལས་རྒྱལ་པོ་སྤྲུལ་ཡུམ་བློན་པོར་བཅས། །བདག་ཅག་གདུང་བའི་དབྱངས་ཀྱིས་ཉེར་བསྐུལ་ན། །སྔོན་ཚེ་རྒྱལ་དབང་པད་མ་ཀཱ་ར་དང། པད་དཀར་འཆང་བ་རིམ་པས་བཀའ་བསྒོས་ཤིང། །འདའ་དཀའི་དམ་ཚིག་གཉན་པོ་རབ་བསྒྲགས་པ། །མ་གཡེལ་མ་གཡེལ་རྡོ་རྗེའི་དམ་ཚིག་དགོངས། །བདག་ཅག་རྨོངས་དང་ཆགས་སྡང་ཕྱོགས་ལྷུང་གིས། །ལས་འབྲས་མ་བསྲུངས་སྤྱི་དོན་རས་སུ་བོར། །དམ་ཚིག་འགལ་སོགས་བསམ་སྦྱོར་ནོངས་པ་ཀུན། །སྙིང་ནས་འཆགས་ཤིང་སྡོམ་ན་བཟོད་མཛོད་ལ། །བསྟན་དང་བསྟན་འཛིན་སྐྱེ་འགྲོའི་བདེ་སྐྱིད་དང། །བསྟན་འཛིན་རྒྱ་མཚོའི་སྐུ་ཚེ་མཛད་འཕྲིན་སྤེལ། །གངས་ལྗོངས་རྒུད་པའི་ཉེར་འཚེ་མྱུར་ཞི་ནས། །ཆོས་སྲིད་རང་དབང་དགའ་སྟོན་སྒྲུབས་ཤིག་ཀྱེ། །མདོར་ན་བསྟན་སྲུང་ཐུ་བོ་ཁྱོད་ཉིད་ལ། །སྙིང་ནས་བསྐུལ་ཞིང་འདོད་དོན་ཉེར་གཏོད་ན། །གློག་ལྟར་མྱུར་བའི་རྣམ་བཞིའི་འཕྲིན་ལས་ཀྱིས། །བསམ་པའི་རེ་བ་སྒྲུབ་ལ་མ་གཡེལ་ཅིག། །།

༄༅། །ཀྱེ། མ་སྨད་བསོད་ནམས་མཐུ་དང་སྨོན་ལམ་གྱིས། །ཕྱག་ན་པད་མོའི་གདུལ་ཞིང་བསིལ་ལྡན་ལྗོངས། །མཐའ་དབུས་ཡུལ་ཁམས་སྐྱོང་ཕྱིར་དེ་དང་དེར། །གནས་ཤིང་་རྒྱུ་བའི་ཡུལ་ལྷ་གཞི་བདག་དང། །ཁྱད་པར་ཚེ་རིང་མཆེད་ལྔ་བསྟན་མའི་ཚོགས། །སྲིད་པའི་ལྷ་དགུ་རྗེ་ཡི་མགུར་ལྷ་སོགས། །བོད་སྐྱོང་ལྷ་སྲུང་གཉན་པོ་མཆེད་འཁོར་རྣམས། །གདུང་བས་འབོད་དོ་འདིར་བྱོན་མགྲོན་དུ་བཞུགས། །རྫས་སྔགས་ཏིང་འཛིན་རོལ་པ་ལས་བྱུང་བའི། །དཀར་གསུམ་མངར་གསུམ་ཕྱེ་མར་ཆང་ཕུད་སོགས། །ཡིད་འོང་བཟའ་བཅའི་བྱེ་བྲག་དུ་མ་དང། །རིན་ཆེན་དར་ཟབ་གོ་མཚོན་སྤྱན་གཟིགས་ཚོགས། །མི་གཙང་ཉེས་ཀུན་སེལ་བའི་བསངས་མཆོད་དག །སྙིང་ནས་མཛའ་ཞིང་དབུ་འཕང་མཐོར་བཏེག་སྟེ། །གསོལ་ལོ་མཆོད་དོ་དམ་སྐོང་དགྱེས་མཛོད་ལ། །བག་མེད་ལེ་ལོས་ནོངས་པ་ཅི་མཆིས་བཤགས། །ཡང་དག་ལྟ་དང་གཞན་ཕན་བྱང་ཆུབ་སེམས། །ཐུབ་པའི་བཀའ་ལུང་བསླུ་བ་མེད་པའི་མཐུས། །སྙིང་རྗེའི་ཡུལ་གྱུར་ནག་ཕྱོགས་སྡེར་གཏོགས་ཀུན། །སྡང་དང་གདུག་པའི་བློ་ངན་རབ་ཞི་ནས། །བླང་དོར་འབྱེད་པའི་བློ་མིག་མྱུར་ཐོབ་ཅིང། །དུས་ཀྱི་རྒུད་པའི་མུན་པ་ཡོངས་སངས་ཏེ། །ཆོས་སྲིད་རང་དབང་གཙང་མའི་སྣང་བའི་དཔལ། །འཆར་བར་ངེས་སོ་དམ་ལྡན་སྙིང་མ་ཞུམ། །སྔོན་ཚེ་སློབ་དཔོན་མཚོ་སྐྱེས་རྡོ་རྗེ་དང། །རྒྱལ་བློན་སེམས་དཔའ་དུ་མས་བཀའ་བསྒོས་ཤིང། །ད་ལྟ་རིག་འཛིན་རྣལ་འབྱོར་བདག་ཅག་གིས། །གདུང་ཤུགས་དྲག་པོས་མཆོད་ཅིང་ཉེར་བསྐུལ་ན། །རང་རང་མཐུ་སྟོབས་ནུས་པའི་དཔུང་བསྐྱེད་དེ། །རང་ཡུལ་གངས་ཅན་ཞིང་དུ་བདེ་སྐྱིད་དཔལ། །མྱུར་དུ་བཞད་པའི་རྣམ་བཞིའི་འཕྲིན་ལས་ཀུན། །མ་ཐོགས་ད་ལྟ་ཉིད་དུ་སྒྲུབས་ཤིག་ཀྱེ། །ལྷག་པར་གངས་ཅན་མགོན་པོ་དང། བསྟན་འཛིན་དམ་པའི་སྐུ་ཚེ་སྲིངས། །མཁའ་མཉམ་བསྟན་འགྲོའི་བདེ་སྐྱིད་སྤེལ། །བཞེད་དོན་ལྷུན་གྱིས་འགྲུབ་པར་མཛོད།།

རབ་རྒྱལ་ཆུ་གླིང་ཟླ་༡ཚེས༡།(1973)