དེ་རིང་འབར་མའི་གཞུང་གིས་བཙོན་པ་མང་པོ་ཞིག་ཉེས་ཡང་ཀློད་གྲོལ་གཏོང་མགོ་ཚུགས་ཡོད་ཅིང་། དེ་དག་ཁྲོད་ཆབ་སྲིད་བཙོན་པ་ཅི་ཙམ་ཡོད་མེད་ཁ་གསལ་བྱུང་མི་འདུག  

ཟླ་འདིའི་ཕྱི་ཚེས་ ༡༡ ཉིན་འབར་མ་དམག་མིའི་གཞུང་གིས་གསལ་བསྒྲགས་ཤིག་སྤེལ་ཏེ། སྲིད་འཛིན་ཐེན་སེན་(Thein Sein)མཆོག་གིས་བཀའ་འཁྲོལ་ཐོབ་པ་ལྟར། འབར་མའི་བཙོན་འོག་གི་བཙོན་པ་༦༣༥༩ ཙམ་ཉེས་ཡང་བཙོན་གྲོལ་གཏོང་རྒྱུའི་ཐག་གཅོད་དེ་བྱུང་བ་ཞིག་ཡིན་ཞིང་། དེ་དག་ཕྱི་ཚེས་ ༡༢ ཉིན་འབར་མའི་ཆོས་ལུགས་དུས་ཆེན་དང་བསྟུན་ཏེ་བཙོན་གྲོལ་གཏོང་རྒྱུ་ཡིན་ཚུལ་བསྒྲགས་ཡོད།  

ཐེངས་འདིར་འབར་མའི་གཞུང་གིས་བཙན་པ་མང་པོ་ཞིག་ཀློད་གྲོལ་བཏང་བ་འདི་ནི། རྒྱལ་སྤྱིའི་ཚོགས་སྡེ་ཁག་དང་འབར་མ་རྒྱལ་ཡོངས་འགྲོ་བ་མིའི་ཐོབ་ཐང་ལྷན་ཚོགས་བཅས་ཀྱིས་སྲིད་འཛིན་ལ་གཞུང་གི་སྲིད་ཇུས་སྔར་ལས་གུ་ཡངས་དང་དམངས་གཙོ་བཅོས་སྒྱུར་གྱི་ཕྱོགས་སུ་གོམ་སྟབས་བསྒྱུར་ཆེད། འབར་མའི་བཙོན་ཁང་ཁག་གི་བཙོན་པ་མང་པོ་ཞིག་ཉེས་ཡང་ཀློད་གྲོལ་གཏོང་དགོས་པའི་འབོད་སྐུལ་ཞུས་པ་དང་ལེན་བྱས་པ་ཞིག་ཡིན་འདུག

ཀློད་གྲོལ་གྱི་ཆོག་མཆན་ཐོབ་ཡོད་པའི་བཙོན་པ་དེ་དག་ཁྲོད་ཆབ་སྲིད་བཙོན་པ་ཅི་ཙམ་ཡོད་མེད་གསལ་བོ་ཤེས་རྟོགས་ཐུབ་མེད་ཀྱང་། ཆབ་སྲིད་བཙོན་པ་༢༠༠༠ ཙམ་ཡོད་པར་ཚོད་དཔག་བྱེད་ཀྱི་ཡོད་འདུག་ལ། དེ་སྔོན་ ༢༠༠༧ དང་ ༢༠༠༨ བཅས་སུ་འཛིན་བཟུང་བྱས་པའི་ཆབ་སྲིད་བཙོན་པ་ཁག་ཅིག་ཀྱང་ཡོད་འདུག

གནད་དོན་འདིའི་ཐད་ཨང་སན་སུའུ་ཀེའི་རྒྱལ་ཡོངས་དམངས་གཙོ་མཐུན་ཚོགས་ཀྱི་མགྲིན་ཚབ་པ་ཝེན་(Nyan Win) གྱིས། “ཆབ་སྲིད་བཙོན་པ་ཀློད་གྲོལ་བཏང་པ་དེ་གཞུང་གི་སྲིད་ཇུས་ལ་དམངས་གཙོ་བཅོས་སྒྱུར་བྱེད་པའི་ཆ་ཤས་གཅིག་ཡིན་པ་དང་། དེ་བཞིན་གསར་འགྱུར་བརྒྱུད་ལམ་གྱི་རང་དབང་སོགས་གནད་དོན་ཕྱོགས་ཡོངས་ནས་གུ་ཡང་ཡར་རྒྱས་གཏོང་དགོས་པ་རེད། ”ཅེས་བརྗོད་འདུག

ཉེ་ལམ་ནས་ཀོབ་ཊི་(Coptic Christians )ཡི་ཤུ་གྲངས་ཉུང་མི་རིགས་ལ་གཞུང་དང་ཡུལ་དེའི་ཁ་ཆེ་བ་ཕྱོགས་གཉིས་ནས་དཀའ་ངལ་རིམ་པར་བྱུང་སྟབས། ཟླ་༡༠་ཚེས་༩་གཟའ་ཉི་མའི་ཉིན་ཀོབ་ཊི་ཡི་ཤུ་བ་བརྒྱ་ཕྲག་མང་པོ་རྒྱལ་ས་ཀའེ་རོ་གྲོང་ཁྱེར་ནང་འཛོམས་ཏེ། གཞུང་གིས་ཡི་ཤུ་ཆོས་ལུགས་པའི་སྟེང་དམིགས་བསལ་དམ་དྲག་དང་། གཞུང་གི་རྩ་ཁྲིམས་ནང་ཡི་ཤུ་ལྷ་ཁང་གསར་རྒྱག་ལ་སྲིད་འཛིན་གྱི་ཆོག་མཆན་ལེན་དགོས་པར་ངོ་རྒོལ་སྐད་འབོད་བྱས་སྐབས། གཞུང་དམག་གིས་ཞི་རྒོལ་པའི་སྟེང་དྲག་གནོན་བྱས་སྐབས། ཁ་ཆེ་བ་མང་པོ་ཞི་རྒོལ་ནང་ཞུགས་ཏེ་གཞུང་གི་དྲག་གནོན་ལ་ངོ་རྒོལ་བྱས་ཡོད་འདུག

ཡུལ་དེའི་ཆུ་ཚོད་ ༢ པ་ཙམ་ནས་ཡེ་ཤུ་བ་རྣམས་ཞི་བའི་སྒོ་ནས་གྲོང་ཁྱེར་གང་སར་འཛོམས་ཏེ། སྐད་འབོད་ངོ་རྒོལ་བྱས་པར་རིམ་བཞིན་གཞུང་དམག་གིས་སྐོར་ཞིང་། ཞི་རྒོལ་པའི་ཁྲོད་དུག་རླངས་གཏོང་པ་དང་། ཞི་རྒོལ་པ་འཛིན་བཟུང་བཅར་རྡུང་བྱས་སྟབས། ཕྱི་དྲོའི་ཆུ་ཚོད་ ༧ པ་ཡས་མས་ཤིག་ནས་ཞི་རྒོལ་པ་རྣམས་གཞུང་དམག་དང་འཁྲུག་འཛིང་ཤོར་ཡོད་པ་དང་། དམག་མིའི་རླངས་འཁོར་དང་ཁྲབ་ལྡན་འཐབ་འཁོར་དག་ལ་མེ་བརྒྱབ་ཅིང་། དྲག་ཆས་དམག་མི་ཁག་ཅིག་ཀྱང་དམར་གསོད་བཏང་ཡོད་འདུག་ལ། ཉིན་དེའི་ཞི་རྒོལ་པའི་ཁྲོད་ད་ལྟའི་བར་རྒལ་དམག་མིའི་གཞུང་ཕྱིར་བསྡུ་དགོས་པ་དང་། ལྷག་པར་དུ་དམག་མིའི་གཞུང་གི་སྤྱི་ཁྱབ་པ་ཊན་ཊ་ཝེ་(Field Marshal Mohamed Tantawi) གོ་གནས་ནས་འབུད་དགོས་པའི་སྐད་འབོད་བྱས་ཡོད་འདུག

ཀོབ་ཊི་ཡེ་ཤུ་གྲངས་ཉུང་མི་རིགས་ཀྱིས་ཨེ་ཇིབ་མི་གྲངས་ས་ཡ་ ༨༠ ནང་གི་བརྒྱ་ཆ་ ༡༠ ལས་ཟིན་མེད་ཅིང་། ཨེ་ཇིབ་གཞུང་གིས་ཡེ་ཤུ་བ་ཁ་ཆེ་ཆོས་ལུགས་ལ་བཅོས་སྒྱུར་ཐོབ་ཐང་ངོས་འཛིན་བྱེད་ཀྱི་ཡོད་པ་ལས། ཆོས་ལུགས་གཞན་དུ་འགྱུར་པར་ངོས་ལེན་བྱེད་པའི་ལམ་ཀ་མེད་ཚུལ་བཀོད་འདུག

གསར་འགོད་པ། བནྡེ་སྐྱབས།