ཀྲུང་གོའི་རྒྱལ་ཡོངས་མི་དམངས་ལ་བསྒྲགས་པའི་བདེན་ཚིག

            བཀུར་བར་འོས་པའི་ཀྲུང་གོའི་རིགས་སོ་སོའི་རྒྱ་ཆེའི་མི་དམངས་རྣམས། ཁྱེད་ཚོས་བོད་ཀྱི་འདས་པའི་ལོ་རྒྱུས་གསལ་བོ་ཞིག་ཤེས་མེད་ལ་ད་ལྟའི་བོད་ཀྱི་གནས་བབ་ངོ་མ་ཡང་ཤེས་ཀྱིན་མེད། དེ་བས་བོད་ལ་གདུང་སེམས་མཉམ་སྐྱེད་ཀྱི་རྒྱབ་སྐྱོར་ཡང་གནང་ཐུབ་ཀྱིན་མེད་ངེས་ན་ངས་འདིར་བདེན་པའི་གསལ་འདེབས་འགའ་ཞུ་འདོད་བྱུང།

          དང་པོ། བོད་ལ་བཙན་འཛུལ་བྱས་པ།

          ༡༩༤༩།༡༠།༡ ཉིན་རྒྱ་ནག་དམར་ཤོག་གི་རྒྱལ་ཁབ་གསར་བཙུགས་ཁྱབ་བསྒྲགས་ཟིན་པའི་རྗེས་ནས་བོད་ལ་དཔུང་འཇུག་བྱས་ཏེ། ༡༩༥༠།༡༠།༡༨ ཉིན་ཆབ་མདོར་བོད་ཀྱི་གཞུང་དམག་ཕམ་པར་བཏང་ཞིང། དེ་རྗེས་གཞི་ནས་བོད་གཞུང་གི་མི་སྣ་འགའ་ཆེད་དུ་བཀུག་ནས། ༡༩༥༡།༥།༢༣ ཉིན་པེ་ཅིན་དུ<བོད་ཞི་བས་བཅིངས་འགྲོལ་འབྱུང་ཐབས་སྐོར་གྱི་དོན་ཚན་བཅུ་བདུན>ཟེར་བ་འཇོག་བཅུག་ནས་འཛམ་གླིང་ཡོངས་ལ་བོད་ཞི་བས་བཅིངས་འགྲོལ་བཏང་བ་ཡིན་ཚུལ་འུད་ཀྱིས་བསྒྲགས།

          གཉིས་པ། བོད་ལ་བཙན་པོས་དབང་སྒྱུར་བྱས་པ།

གྲོས་ཆོད་དེའི་ནང་དུ་བོད་ཀྱི་སྤྱི་ཚོགས་ལམ་ལུགས་ལ་གསར་བརྗེ་རིམ་པས་བྱ་རྒྱུ་དང་ཏཱ་ལའི་བླ་མའི་སྐུ་དབང་ལ་འགྱུར་བ་མི་གཏོང་ཚུལ་སོགས་བཀོད་ཡོད་ན་ཡང་ལག་ལེན་གོ་ལྡོག་པས་༡༩༥༩།༣།༡༠ ཉིན་ལྷ་སར་བོད་མི་ཁྲི་ཚོ་དུ་མས་ངོ་རྒོལ་སྐད་འབོད་བརྒྱབ་པ་མ་ཟད་ཏཱ་ལའི་བླ་མའི་བཀའ་ཤག་དང་བཅས་པའི་བོད་མི་ཁྲི་ཚོ་མང་པོ་རྒྱ་གར་དུ་སྐྱབས་བཅོལ་ལ་ཕེབས་དགོས་བྱུང་།

          གསུམ་པ། བོད་ལ་དོན་ངོ་མའི་མི་རིགས་ས་ཁོངས་རང་སྐྱོང་མེད་པ།

          བོད་ནི་དབུས་གཙང་དང་ཁམས། ཨ་མདོ་བཅས་ས་ཁུལ་ཆེན་པོ་གསུམ་གྱིས་གྲུབ་པའི་ས་ཁོངས་ཧ་ཅང་ཆེ་བའི་སྐད་ཡིག་གཅིག་གྱུར་གྱི་མི་རིགས་ཤིག་ཡིན་པར་མ་ཟད་རང་བཙན་གྱི་ལོ་རྒྱུས་ཡོད་པའི་རྒྱལ་ཁབ་ཅིག་ཡིན་ན་ཡང། རྒྱ་ནག་གཞུང་གིས་༡༩༥༡ ལོར་བོད་རང་སྐྱོང་ལྗོངས་ཟེར་བ་གསར་བཙུགས་དང་ལྷན་ཁམས་དང་ཨ་མདོའི་ས་ཁུལ་འགའ་ཞིག་ཞིང་ཆེན་གཞན་ཁོངས་སུ་ཁ་གཏོར་ནས་བོད་རིགས་རང་སྐྱོང་ཁུལ་དང་རང་སྐྱོང་རྫོང་གི་མིང་བཏགས་ཏེ། དོན་གྱིས་བོད་མི་རིགས་ཀྱི་རང་སྐྱོང་བདག་དབང་མེད་པར་བཏང་ཡོད་པར་མ་ཟད་རྒྱ་རིགས་འབོར་ཆེན་གནས་སྤོས་ཀྱིས་བོད་འདི་མི་སེར་སྤེལ་ཡུལ་དུ་སྒྱུར་བཞིན་ཡོད།

          བཞི་བ། བོད་རང་བཙན་གྱི་བདག་དབང་རྩོད་ཀྱིན་མེད།

ད་ལྟ་བོད་མི་རིགས་ཀྱི་དོན་གྱི་བདག་པོ་ཏཱ་ལའི་བླ་མ་མཆོག་དང་བཙན་བྱོལ་བོད་གཞུང་གིས་ཁ་ཞེ་གཉིས་མེད་ཀྱིས་བོད་རང་བཙན་མི་རྩོད་པར་གོང་གསལ་བོད་རིགས་ཡོངས་རྫོགས་གཅིག་ཏུ་སྒྲིལ་བའི་མི་རིགས་རང་སྐྱོང་མིང་དོན་མཚུངས་པ་ཞིག་ཡོང་བའི་དགོས་འདུན་ཡིག་ཆ་དང་བཅས་པ་ཀྲུང་དབྱང་ལ་ཕུལ་ཡོད་ན་ཡང། ད་དུང་མེས་རྒྱལ་ཁ་བྲལ་གྱི་ཞྭ་མོ་གཡོགས་ནས་བདེན་དོན་རྩིས་མེད་དུ་གཏོང་བཞིན་པ་རེད།

          ལྔ་བ། དྲང་བདེན་དང་ཞི་བའི་འཐབ་རྩོད་ཁོ་ན།

རྒྱ་ནག་གིས་བོད་ལ་ཐོག་མར་དཔུང་འཇུག་བྱས་དུས་ནས་༡༩༥༩ལོའི་བར་ལ་བོད་གཞུང་དམངས་གཉིས་ངོས་ནས་དྲག་པོ་ལ་དྲག་པོའི་ཡ་ལན་གང་ཐུབ་གནང་ཡོད་པ་ལས། བཙན་བྱོལ་དུ་ཕེབས་པ་ནས་ད་ལྟའི་བར་དུ་བོད་ཕྱི་ནང་གཉིས་སུ་རམི་རིགས་ཀྱི་འཐབ་རྩོད་ཀྱི་ལས་འགུལ་ཚང་མ་ནམ་ཡང་དྲག་པོའི་ལམ་དུ་ཕྱིན་མེད་ལ། རྒྱ་ནག་གཞུང་ལྟར་ལོ་རྒྱུས་འཁྱོག་བརྗོད་དང་དོན་གནས་རྫུན་བཟོ་སོགས་ཧམ་བཤད་གང་ཡང་བྱེད་ཀྱིན་མེད། ང་ཚོའི་འཐབ་རྩོད་འདི་ཞི་བ་དང་དྲང་བདེན་འབའ་ཞིག་ཡིན་པ་འཛམ་གླིང་ཡོངས་སུ་གསལ་བོ་ཆགས་ཡོད།

          རྒྱ་ནག་གཞུང་གིས་ད་དུང་ཡང་མི་རིགས་སྲིད་ཇུས་ལ་ལེགས་བཅོས་མ་གནང་བ་དང་ཆོས་དད་རང་དབང་གིས་གཙོས་འགྲོ་བ་མིའི་ཐོབ་ཐང་ལ་ཆེ་མཐོང་མ་གནང་བར་མུ་མཐུད་དབང་ཤེད་དང་དྲག་ཤུགས་ཀྱིས་མི་རིགས་ལ་གཉའ་གནོན་བྱེད་རྒྱུ་ཡིན་ཚེ་བོད་ནང་གི་ཁ་སང་དེ་རིང་གི་རང་ལུས་མེར་སྲེག་གི་ཛ་དྲག་ངོ་རྒོལ་གྱི་མེ་ལྕེ་ཞིག་འཕྱུར་བཞིན་པ་འདི་དྲག་པོའི་མེ་རླབས་ཆེན་པོ་ཞིག་ཏུ་མི་འགྱུར་བའི་ངེས་པ་མེད་ལ། དེའི་མཇུག་འབྲས་ཚང་མ་རྒྱ་ནག་གཞུང་གིས་འགན་འཁུར་དགོས་པ་འདི་དག་རྒྱ་ཆེའི་མི་དམངས་དུང་ཕྱུར་མང་པོས་གསལ་རྟོགས་དང་བཅས་བདེན་པའི་རྒྱབ་ལངས་གནང་རོགས་ཞུ།

          དྲུག ཏཱ་ལའི་བླ་མ་ནི་ཞི་བདེའི་དེད་དཔོན་ངོ་མ་ཡིན།

༸སྐྱབས་མགོན་༸རྒྱལ་བ་བསྟན་འཛིན་རྒྱ་མཚོ་ནི་འཕགས་མཆོག་ཐུགས་རྗེ་ཆེན་པོའི་རྣམ་སྤྲུལ་བྱང་ཆུབ་སེམས་དཔའ་ཆེན་པོ་ཡིན་པས་འཛམ་གླིང་ཞི་བདེའི་དེད་དཔོན་ཆེན་མོ་མཚན་དོན་ཡོངས་སུ་མཚུངས་པ་ཞིག་ཡིན་པར་ཐེ་ཚོམ་ཅི་ཡང་མེད་མོད་རྒྱ་ནག་དམར་ཕྱོགས་པས་རང་གི་ཁེ་ཕན་གང་ཞིག་གི་ཆེད་དུ་ནག་ཕྱོགས་མི་སྣ་ཞིག་ཏུ་ངན་བརྗོད་སྤེལ་མུས་ཡིན། ཏཱ་ལའི་བླ་མས་ལྷག་བསམ་རྣམ་དག་དང་རེ་སྨོན་ཆེན་པོས་མི་རིགས་འཆམ་མཐུན་དང་འཛམ་གླིང་ཞི་བདེར་སྨན་པའི་ཕྱག་ལས་མུ་མཐུད་གནང་ངེས་ཡིན་ན་ནང་པ་སངས་རྒྱས་པའི་རྗེས་འཇུག་དད་ལྡན་མི་མང་གིས་གཙོས་ཀྲུང་གོའི་མི་དམངས་ཡོངས་ཀྱིས་ཁོང་ཉིད་ལ་ཡིད་ཆེས་རེ་བཅོལ་གྱིས་ཀྲུང་གོའི་སྐམ་ས་ཆེན་པོར་ཕེབས་བསུ་བྱེད་རྒྱུ་ནི་སྐབས་བབ་ཀྱི་གཟི་བརྗིད་དང་རླབས་ཆེན་གྱི་འོས་འགན་ཞིག་ཡིན་པ་ཅིས་ཀྱང་གསལ་རྟོགས་ཡོང་བའི་རེ་བ་ཞུ་གིན་ཡོད།

བདེན་པ་རྣམ་པར་རྒྱལ་ནས་འཛམ་གླིང་ཞི་བདེ་ཡོང་བར་སྨོན་ནོ།།

པེན་བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་ཆབ་བྲག་ལྷ་མོ་སྐྱབས་ཀྱིས།

༢༠༡༢།༣།༡༠།ཉིན་སླར་ཡང་ལས་སྣོན་ཅུང་དང་བཅས་ཕུལ་བ་དགེའོ།

ང་ཚོས་ཅིའི་ཕྱིར་ངོ་རྒོལ་བྱེད་པ།

 འདིརབོད་མིས་ཅིའི་ཕྱིར་ལུས་སྲོག་ལོངས་སྤྱོད་ཕངས་མེད་བཏང་ནས་རྒྱ་གཞུང་ལ་ངོ་རྒོལ་བྱེད་དགོས་པའི་རྒྱུ་རྐྱེན་གཙོ་བོ་འགའ་རགས་བསྡུས་སུ་བཀོད་དེ་རྒྱ་གཞུང་གི་སྐྱོན་མཚང་ཚབས་ཆེ་འགར་ཐེར་འདོན་བྱས་ཡོད།

ཀ༽ བོད་འདི་ཀྲུང་གོའི་ཆ་ཤས་ཤིག་ཡིན་ཚུལ་ལ་ལོ་རྒྱུས་འཁྱོག་བརྗོད་རྒྱུན་མར་བྱས་ཏེ་བོད་ཀྱི་མི་རབས་གསར་བའི་བསམ་བློ་རྨོངས་སྒྱུར་གྱི་ཇུས་ངན་སྤེལ་ནས་མི་རིགས་ཀྱི་ལོ་རྒྱུས་དང་གཞི་རྩའི་ཐོབ་ཐང་ཉམས་བརླག་གི་ཉེས་པ་ཆེན་པོ་བསགས་པ། ཁ༽ བོད་ཞི་བས་བཅིངས་འགྲོལ་བཏང་ཚུལ་ལ་ཧམ་བཤད་བྱས་ཏེ་བཙན་འཛུལ་གྱི་ཉེས་སྐྱོན་ཆེན་པོ་འགེབས་ཐབས་དང་མི་རབས་གསར་བ་བསླུ་ཐབས་ཀྱི་ཉེས་དོན་ཆེད་བཟོས། ག༽ བོད་ཆོལ་ཁ་གསུམ་པོ་དུམ་བུ་མང་པོར་བཅད་བགོས་ཀྱིས་མི་རིགས་གཅིག་གྱུར་གྱི་རང་སྐྱོང་ཁེ་དབང་ལ་གནོད་ཚབས་ཆེན་པོ་བཏང་ཞིང་མི་རིགས་ཀྱི་ངོ་བོ་གཞན་འགྱུར་གྱི་ཇུས་ངན་སྤེལ་བ། ང༽ རྒྱ་རིགས་གྲངས་མང་མི་རིགས་བོད་དུ་གནས་སྤོ་ཤུགས་ཆེན་གྱིས་བོད་འདི་མི་སེར་སྤེལ་ཡུལ་བཟོ་བཞིན་པའི་ཇུས་ངན་སྤེལ་བཞིན་པ། ཅ༽ བོད་ཀྱི་ཆོས་སྲིད་ལུགས་གཉིས་ཀྱི་དོན་གྱི་བདག་པོ་༸གོང་ས༸སྐྱབས་མགོན་ཆེན་པོར་མཐའ་གཅིག་ཏུ་ཉེས་འགེལ་སྡིགས་དམོད་ཀྱིས་བོད་མིའི་རང་དབང་དད་མོས་ལ་བཙན་གནོན་རྒྱུན་མར་བྱེད་པ། ཆ༽ བོད་མི་རིགས་ཀྱི་བདེན་པའི་འཐབ་རྩོད་ལ་གདོང་མཆོང་དང་འབད་འཐབ་བྱེད་མཁན་རིགས་ལ་ཉེས་རྡུང་དང་ཁྲིམས་གཅོད་ཀྱིས་མིའི་ཐོབ་ཐང་དང་རང་དབང་ལ་བཙན་གནོན་ཤུགས་དྲག་བྱེད་པ། ཇ༽ བོད་བཅིངས་འགྲོལ་ལ་ཁ་གཡར་ནས་ཐོག་མ་ནས་དམག་དཔུང་གིས་བོད་ཡུལ་བཙན་བཟུང་བྱས་པ་ནས་མཚམས་མ་ཆད་པར་བོད་ཁུལ་ཡོངས་སུ་དམག་དཔུང་བརྟན་གནས་དང་ལྷག་པར་ཨ་མདོ་རྔ་བ་དང་གསེར་རྟས་གཙོས་བོད་མི་རིགས་ཀྱི་རང་དབང་བདེན་པའི་འཐབ་རྩོད་ཆེད་དུ་ཞི་རྒོལ་ཡང་ཡང་བྱེད་ས་ཁག་ལ་དྲག་དཔུང་གིས་བསྐོར་ཅིང་འགྲུལ་བཞུད་དང་འབྲེལ་ལམ་རིགས་ཡོངས་སུ་འགོག་པའི་གནས་སྟངས་འདིས་བོད་མི་སྤྱི་དང་ལྷག་པར་དུ་ས་གནས་མི་མང་ལ་ཕོག་ཐུག་དང་ཞེ་འཁོན་སློང་གིན་ཡོད།  ཉ༽ ༸གོང་ས་༸སྐྱབས་མགོན་ཆེན་པོ་མཆོག་དང་བཙན་བྱོལ་བོད་གཞུང་ངོས་ནས་འབྱུང་འགྱུར་བོད་འདི་ཀྲུང་གོའི་མངའ་ཁོངས་སུ་མཉམ་གནས་འཆམ་མཐུན་གྱིས་འཚོ་རྒྱུར་ཕྱི་གསལ་ནང་གསལ་གྱིས་བོད་རིགས་རང་སྐྱོང་སྐོར་ལ་ཀྲུང་གོའི་རྩ་ཁྲིམས་དང་རང་སྐྱོང་བཅའ་ཁྲིམས་གཞིར་བཟུང་གི་གཞུང་འབྲེལ་བསམ་འཆར་ཡིག་ཆ་ཕུལ་བར་ཡང་ངོ་བོ་འགྱུར་བའམ་ཕྱེད་རང་བཙན་སོགས་ཀྱི་མིང་འདོགས་ཀྱིས་བོད་རིགས་ཚང་མར་ས་ཁོངས་གཅིག་གི་རང་སྐྱོང་སྤྲོད་འདོད་མེད་པའི་རྣམ་འགྱུར་ཤུགས་ཆེན་བསྟན་ནས་བོད་རྒྱ་ཞི་མོལ་གྱི་ལམ་བུ་བཀག་ཅིང་མི་རིགས་རང་སྐྱོང་གི་གཞི་རྩའི་ཐོབ་ཐང་རྩིས་མེད་བཏང་བ་སོགས་གོང་གསལ་གནད་དོན་འདི་དག་གིས་གཞིས་ལུས་བོད་མི་དམངས་ཀྱི་སེམས་ལ་རྨ་ཁ་ཆེན་པོ་བཟོས་ཏེ་རྒྱ་གཞུང་ལ་ངོ་རྒོལ་གྱི་རླབས་ཕྲེང་དང་མེ་ལྕེ་ཤུགས་ཀྱིས་མཆེད་བཞིན་པ་འདི་ཀྲུང་གོའི་གཞུང་དམངས་གཉིས་ཀྱིས་གཙོས་འཛམ་གླིང་མི་དམངས་ཀྱིས་གསལ་རྟོགས་ཐུབ་རྒྱུའི་འབོད་སྐུལ་ཞུ་རྒྱུ་དང་ཆབས་ཅིག་གཞིས་ལུས་རྒྱ་ཆེའི་བོད་དམངས་ཀྱིས་རང་གི་རྩ་ཆེའི་ཚེ་སྲོག་བདག་གཅེས་གཙོར་བཟུང་སྒོས་སྙིང་སྟོབས་ཞུམ་པ་མེད་པར་མུ་མཐུད་དེ་དོན་ཕན་ཆེ་བའི་ངོ་རྒོལ་གྱི་རྣམ་གྲངས་རྒྱ་མཚོའི་རླབས་ཕྲེང་བཞིན་འཕྱུར་བར་འབོད་སྐུལ་ཞུ་འདོད་བྱུང་ལ་རྒྱལ་སྤྱིའི་གཟུར་གནས་གཞུང་དམངས་ཡོངས་ཀྱིས་རྒྱབ་སྐྱོར་ཅི་ནུས་གནང་སྐྱོང་ཡོང་བའི་གཞེན་སྐུལ་ཡང་ཞུ་གིན་ཡོད་པ་བཅས།
བོད་ཀྱི་རྩོམ་པ་པོའི་མཐུན་ཚོགས་ཀྱི་ཚོགས་གཙོ་སྤྱི་ཟུར་ཆབ་བྲག་ལྷ་མོ་སྐྱབས་ཀྱིས་སྐུ་ཞབས་ཚངས་དབྱངས་རྒྱ་མཚོ་ལགས་ཀྱི་རེ་བསྐུལ་དང་བླངས་ཀྱིས་གསར་འགོད་གསལ་བསྒྲགས་ཀྱི་ཟིན་བྲིས་སུ་ཕུལ། ༢༠༡༢།༢།༡༤།