ཚེས་༦ཉིན་གྱི་བོད་ནང་གི་ཆུ་ཚོད་ ༢ དང་སྐར་མ་ ༤༠ ཙམ་ལ་རྔ་པ་རྫོང་གི་ཁྲོམ་གཞུང་དུ་གྲྭ་བ་གཅིག་དང་མི་སྐྱ་གཅིག་གིས་ལྷན་དུ་རང་ལུས་མེར་བསྲེགས་བཏང་ཡོད་སྐོར་བརྗོད་འདུག སྐབས་དེར་ཁོང་གཉིས་ཀྱིས་ཕྱག་ཐལ་མོ་སྦྱར་ཅིང་ཞལ་ཀིརྟི་དགོན་པའི་ཕྱོགས་སུ་འཁོར་ཏེ། འབོད་ཚིག་མང་པོ་ཞིག་བསྒྲགས་ཡོད་ཀྱང་རོབ་ཙམ་ཐོས་པ་ནི་ “རྒྱལ་བ་རིན་པོ་ཆེ་བོད་དུ་གདན་འདྲེན་ཞུ་དགོས། རྒྱལ་བ་རིན་པོ་ཆེ་སྐུ་ཚེ་ཁྲི་ལོ་བརྟན་པར་ཤོག” ཅེས་བསྒྲགས་ཡོད་འདུག ཡུན་ཙམ་གྱི་རྗེས་སུ་རྒྱ་གཞུང་གི་དམག་མི་དང་ཉེན་རྟོག་པ་འབྱོར་ཏེ་བཙན་ཁྲིད་བྱས་ཡོད་འདུག

ཕར་བལྟས་ཚོད་ལ་ཁོང་གཉིས་ལོ་ཉི་ཤུའི་ནང་ཞིག་ཡིན་པ་དང་། གྲྭ་བ་དེ་ཕལ་ཆེར་སྐུ་གྲོངས་ཡོད་པ་དང་། མི་སྐྱ་དེའི་གནས་སྟངས་གསལ་བོ་ཤེས་མ་ཐུབ་ཀྱང་མེ་ཤུགས་ཧ་ཅང་ཆེན་པོ་འབར་ཡོད་སྟབས་གཉིས་ཀའི་ཚེ་སྲོག་ཤོར་ཡོད་པར་ཚོད་དཔག་བྱེད་ཀྱིན་ཡོད་འདུག གཞན་གྲྭ་བ་དེ་དང་མི་སྐྱ་དེ་གཉིས་རྔ་པ་གང་ནས་ཡིན་པ་དང་ལོ་ཚད་དང་མིང་སོགས་ད་སྔ་གསལ་བོ་ཤེས་རྟོགས་ཐུབ་མ་སོང་ཟེར།

ཟླ་འདིའི་ཕྱི་ཚེས་ ༡༥ ཉིན་རྒྱ་གཞུང་གི་ཉེན་རྟོག་པས་རྔ༌པ་ཀིརྟི་དགོན་པའི་གྲྭ་འཇིགས་མེད་ཆོས་འཕེལ་འཛིན་བཟུང་བྱས་ཡོད་པ་དང་། ཕྱི་ཚེས་ ༡༧ ཉིན་ཀིརྟི་དགོན་གྲྭ་ཕུན་ཚོགས་འཛིན་བཟུང་བྱས་ཡོད་འདུག

རྔ་པ་རྫོང་མཁར་དང་ཐག་ཉེ་བའི་བོད་མི་མང་པོས་བོད་ཆས་གྱོན་ནས་རྔ་པའི་ཁྲོམ་གཞུང་རྒྱུན་ལྡན་ལས་མི་ཚོགས་མང་པ་འདུ་འཛོམས་བྱུང་ཡོད་པ་དང་། མི་མང་གིས་ཁྲོམ་ནས་མ་ཎི་འདོན་པ་དང་ཟས་བཅད་བྱས་ཏེ་གདུང་སེམས་མཉམ་སྐྱེད་ཀྱི་རྣམ་འགྱུར་བསྟན་ཡོད་པ་དང་། ཐེངས་གཉིས་ཙམ་ལ་མི་མང་གིས་ཡར་ལངས་བྱེད་གྲབ་བྱས་ཀྱང་སྡེབ་གཅིག་ལ་ལངས་མ་ཐུབ་པས་ན་ཉེན་རྟོག་པ་དང་དམག་མི་སོགས་ཀྱིས་མེ་མདའ་བཏད་དེ་མི་མང་གི་འདུ་འཛོམས་གཏོར་ཐབས་བྱས་ཡོད་འདུག ཡང་རྫོང་མཁར་དང་ཐག་ཉེ་བའི་བོད་མི་རྣམས་ཀྱིས་བོད་ཆས་གཙང་མ་གྱོན་ནས་གྲོང་སྡེ་སོ་སོའི་ནང་དུ་མ་ཎི་འཚོགས་ཤིང་ཟས་བཅད་སྙུངས་གནས་གནང་ཡོད་འདུག

ཕྱི་ཚེས་ ༡༧ ཉིན་རང་ལུས་མེར་བསྲེགས་བཏང་སྟེ་ངོ་རྒོལ་གནང་མཁན་བཙུན་མ་བསྟན་འཛིན་དབང་མོའི་སྐུ་ཕུང་ཉིན་དེའི་མཚན་མོ་རང་ལ་མེར་སྲེག་བཏང་བཅུག་སྟེ་མེད་པར་བཟོས་ཡོད་འདུག་ཀྱང་། ད་ཆ་རྒྱ་གཞུང་གིས་དོན་རྐྱེན་དེ་ངོས་ལེན་བྱས་མེད།  ཉིན་ཤས་གོང་ཞང་རེ་རེའི་ནང་ལ་མི་མང་བསྡུས་ནས་ངོ་རྒོལ་བྱས་པའི་རྐྱེན་གྱིས་འདས་གྲོངས་སུ་གྱུར་པ་ཡིན་ན་གྲྭ་པ་གཅིག་ཀྱང་སྨོན་ལམ་གསུང་བར་མི་གཏོང་རྒྱུ་དང་། འགན་ཚང་མ་ཤུལ་ལུས་སྡེ་དཔོན་དང་ནང་མིས་ཁུར་དགོས་ཚུལ་གྱི་ཉེན་བརྡ་གྲོང་སྡེ་རེ་རེ་དང་མི་ཚང་རེ་རེ་བྱས་ནས་གཏོང་གི་ཡོད་འདུག 

ཕྱི་ཚེས་ ༡༧ ཉིན་གྱི་མཚན་མོ་རྔ་པ་རྫོང་གཅའ་ཞང་ནག་ཚང་མའི་སི་རིག་ཚང་གི་རྔ་པ་ཀིརྟི་དགོན་པའི་གྲྭ་ཕུན་ཚོགས། རང་ལོ་ ༢༨ ཙམ་ཡིན་པ་རང་ཤག་ནས་ཉེན་རྟོག་པས་གཅར་རྡུང་གཏོང་བཞིན་འཛིན་བཟུང་བྱས་ཡོད་པ་དང་། གྲྭ་ཤག་གི་ནང་ཧྲིལ་བོ་སྔོག་བཤེར་བྱས་ཡོད་ཅིང་། ད་ཆར་ཁོང་གང་དུ་བཀག་ཉར་བྱས་ཡོད་མེད་ཤེས་རྟོགས་ཐུབ་མེད།

ཕྱི་ཚེས་ ༡༥ ཉིན་རྔ་པ་རྫོང་ཆོས་རྗེ་མ་ཞང་སོ་རུ་མ་ནས་ཡིན་པའི་རྔ༌པ་ཀིརྟི་དགོན་པའི་གྲྭ་འཇིགས་མེད་ཆོས་འཕེལ་ཞུ་བ་འཛིན་བཟུང་བྱས་ཡོད་ཅིང་ད་ལྟ་གང་དུ་བཀག་ཉར་བྱས་ཡོད་མེད་ཤེས་རྟོགས་ཐུབ་མེད། ཁོང་གཉིས་ཀ་བཀག་ཉར་བྱེད་དགོས་པའི་རྒྱུ་མཚན་གང་ཡང་གསལ་བཤད་བྱས་མེད་ཅིང་། ཕྱི་ཚེས་ ༡༥ ཉིན་རྒྱལ་གཅེས་དཔའ་བོ་ནོར་བུ་དགྲ་འདུལ་གྱིས་རང་ལུས་མེར་བསྲེགས་བཏང་རྗེས་ཀྱི་ཉིན་དེར་མི་སྐྱ་ཁ་ཤས་ཤིག་འཛིན་བཟུང་བཀག་ཉར་བྱས་ཡོད་ཚུལ་འདུག་ཀྱང་མིང་སོགས་ཞིབ་ཕྲའི་གནས་ཚུལ་ཤེས་རྟོགས་མ་བྱུང་།

གནས་ཚུལ་གཏོང་མཁན། གྲྭ་བློ་བཟང་ཡེ་ཤེས་དང་ཀ་ཉག་ཚེ་རིང་

       དེ་རིང་ཡང་ཨ་མདོ་ རྔ་པ་རྫོང་ཆོས་རྗེ་མ་ཞང་སོ་རུ་མ་སྡེ་བའི་བུ་རང་ལོ་ ༡༧ ཡིན་པའི་ཀིརྟི་དགོན་པའི་དུས་འཁོར་གྲྭ་ཚང་གི་གྲྭ་སྐལ་བཟང་དབང་ཕྱུག་ལགས་ཀྱིས་ ༸གོང་ས་མཆོག་གི་སྐུ་པར་ཞིག་ལག་ཏུ་བཟུང་ནས་རྔ་པ་རྫོང་མཁར་གྱི་གཞུང་ལམ་དུ་ ཐོན་ཏེ་རང་ལུས་ལ་མེ་སྦར་ཏེ་རྒྱ་ནག་ གཞུང་ལ་ངོ་རྒོལ་སྐད་འབོད་གནང་པར་དེ་མ་ཐག་རྒྱ་དམག་གིས་བསྐོར་ནས་མེ་བསད་ཅིང་ གཅར་རྡུང་དྲག་པོ་གཏོང་བཞིན་བཟུང་འདུག

 

   སྐབས་དེར་གཡས་གཡོན་གྱི་མི་མང་གིས་སྐད་འབོད་བྱེད་རྩིས་བྱས་པར་དྲག་ཆས་ཉེན་རྟོག་པ་དང་དྲག་ཆས་དམག་མི་སོགས་ཀྱིས་མེ་མདས་འཇིགས་སྐུལ་གྱིས་བདས་ འདུག དེ་མཚུངས་སུ་གཡུལ་ས་ལྟ་བུའི་གནས་སྟངས་འོག་ཡོད་པའི་རྔ་པ་རྫོང་མཁར་དང་ཀིརྟི་ དགོན་པ་སོགས་ལ་སྔར་བས་དམག་མི་མང་དུ་བཏང་ནས་ཕྱི་ནང་གི་འགྲུལ་བཞུད་ཡོངས་ རྫོགས་བཀག་སྡོམ་བྱས་ཏེ་དམ་དྲགས་ཤུགས་ཆེ་རུ་གཏོང་བཞིན་འདུག་ཟེར།

      ཉིན་ཤས་སྔོན་ཀིརྟི་དགོན་པའི་གླིང་ བར་དང་རྔ་པའི་ཁྲོམ་གཞུང་སོགས་ལ་ཡི་གེ་མང་པོ་སྦྱར་བའི་ནང་མུ་མཐུད་གནས་སྟངས་ འདི་ལྟར་ལྷག་ན་མི་མང་པོས་རང་སྲོག་བློས་གཏོང་གིས་ངོ་རྒོལ་བྱ་རྒྱུའི་གྲ་ སྒྲིག་ཡོད་ཚུལ་བཀོད་ཡོད་འདུག

 

 

  བཞུགས་སྒར་ཀིརྟི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་རིང་གཉིས་ཀྱིས། ཕྱི་ལོ་ ༢༠༡༡ ཟླ་ ༩ ཚེས་༢༦ ལ།

   ༢༠༡༡ ཟླ་ ༩ ཚེས་ ༢༦ ཉིན་གྱི་བོད་ནང་གི་དུས་ཚོད་བཅུ་དང་ཕྱེད་ཀ་ཡོལ་ཙམ་ལ་རྔ་པ་རྫོང་རྨེའུ་རུ་མའི་ རུ་ཆེན་གཉིས་པའི་ཇ་རུ་ཚང་གི་ཚེ་རིང་བཀྲ་ཤིས་ཀྱི་བུ་རྒྱལ་གཅེས་དཔའ་བོ་བློ་ བཟང་ཕུན་ཚོགས་ཀྱི་སྤུན་ཆུང་བ་རྔ་པ་ཀིརྟི་དགོན་པའི་གྲྭ་བློ་བཟང་སྐལ་བཟང་། རང་ལོ་ ༡༨ ཡིན་པ་ཁོང་དང་། རྔ་པ་རྫོང་རྨེའུ་རུ་མའི་རུ་ཆེན་གཉིས་པའི་ཚེ་རྒྱས་ཚང་གི་རྔ་པ་ཀིརྟི་དགོན་ པའི་གྲྭ་བློ་བཟང་དཀོན་མཆོག རང་ལོ་ ༡༨ ཡས་མས་ཙམ་ཡིན་པ་ཁོང་གཉིས་ཀྱིས་རྔ་པ་རྫོང་ཐོག་གི་ཁྲོམ་གཞུང་དུ་ཐོན་ནས་རྒྱལ་ བ་རིན་པོ་ཆེ་སྐུ་ཚེ་ཁྲི་ལོ་བརྟན་པར་ཤོག བོད་ལ་ཆོས་དད་རང་དབང་དགོས། སོགས་ཀྱིས་འབོད་ཚིག་སྒྲོག་བཞིན་རང་ལུས་མེར་སྲེག་བཏང་ཡོད་པ་དང་། ཅུང་ཙམ་མ་འགོར་བར་རྒྱ་གཞུང་གི་ཉེན་རྟོག་པ་དང་། དྲག་ཆས་དམག་དཔུང་གིས་གཡས་གཡོན་ནས་ཆུ་དང་མེ་གསོད་ཡོ་ཆས་སོགས་བེད་སྤྱད་ནས་མེ་ བསད་ཡོད་ཀྱང་། སྐབས་དེར་མི་མང་གིས་སུ་ཡིན་ངོ་ཐག་མ་ཆོད་ཀྱང་གཅིག་གྲོངས་ཡོད་པའི་མཐོང་སྣང་ བྱུང་ཡོད་འདུག་པ་ཙམ་ལས་གསལ་པོ་གང་ཡང་མེད་པ་དང་། གཅིག་གྲོངས་མེད་པ་གསལ་པོ་ཤེས་ཡོད་འདུག 
མེ་ བསད་མ་ཐག་རྒྱ་གཞུང་གི་ཉེན་རྟོག་པས་ཁྱེར་ཡོད་ཀྱང་གང་དུ་ཁྱེར་ཡོད་མེད་དང་། ད་ལྟའི་ཁོང་གཉིས་ཀྱིས་གནས་ཚུལ་ཤེས་རྟོགས་ཐུབ་ཀྱི་མེད་འདུགཁོང་གཉིས་ཀྱིས་དེ་ ལྟར་ངོ་རྒོལ་བྱེད་དགོས་པའི་རྒྱུ་མཚན་ནི་ལོ་མང་པོའི་རིང་རྒྱ་ནག་གཞུང་གིས་ བོད་ཐོག་འཛིན་པའི་སྲིད་བྱུས་ཀྱི་ནོར་འཁྲུལ་ལས་བྱུང་བ་སྨོས་མེད་དང་། བྱེ་བྲག་ད་ལོའི་ཕྱི་ཟླ་༣ ཚེས་ ༡༦ ཉིན་རྒྱལ་གཅེས་དཔའ་བོ་ཕུན་ཚོགས་ལགས་ཀྱིས་རང་ལུས་མེར་སྲེག་བཏང་སྟེ་ངོ་རྒོལ་ བྱས་པ་ནས་བཟུང་ད་བར་རྔ་པའི་ས་གནས་ཡོངས་ལ་དམ་བསྒྲགས་བཀག་སྡོམ་ཤུགས་ཆེ་བྱས་པ་ དང་།ལྷག་ པར་དུ་ཀིརྟི་དགོན་པའི་གྲྭ་པ་རྣམས་ཟླ་བ་ལྔ་ལྷག་རིང་དགོན་པའི་ལྕགས་རིའི་ཕྱི་ ལ་ཐོན་མ་བཅུག་པར་བཙོན་པ་དང་གཅིག་མཚུངས་ཀྱིས་བཀག་སྡོམ་བྱས་པ་དང་། རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བའི་ལས་འགུལ་སྤེལ་ནས་གྲྭ་པ་བརྒྱ་ཕྲག་ མང་པོ་དགོན་པའི་ནང་ནས་ཕྱིར་ཕུད་བཏང་ཞིང་། རྒྱལ་གཅེས་དཔའ་བོ་ཕུན་ཚོགས་ལགས་ཀྱིས་རང་ལུས་མེར་སྲེག་བཏང་བའི་ལས་འགུལ་ལ་ འབྲེལ་བ་ཡོད་པར་བསྙོན་འཛུགས་བྱས་ཏེ་མི་གསོད་ལག་དམར་དང་། མི་གསོད་ལག་དམར་གྱི་ལག་རོགས་ཀྱི་ཉེས་མིག་གཡོགས་ནས་ལོ་མང་པོའི་ཁྲིམས་ཐག་བཅད་ པ་སོགས་བཟོད་ཐབས་བྲལ་གནས་ཚུལ་མང་པོ་ཞིག་བྱུང་དང་འབྱུང་བཞིན་པར་མ་ཟད། རྔ་པ་ཀིརྟི་དགོན་པའི་ནང་ལ་ད་ལྟ་ད་དུང་རྒྱ་གཞུང་གི་ལས་བྱེད་པ་བརྒྱ་ཕྲག་མང་ པོ་ཉིན་མཚན་གཉིས་ཀར་བསྡད་ནས་སུན་གཙེར་བཟོ་བཞིན་ཡོད་པ་བཅས་ཀྱིས་ཡིན་འདུག
ཁོང་ གཉིས་ནི་ཆུང་དུས་ནས་རྔ་པ་ཀིརྟི་དགོན་པའི་ནང་གྲྭ་པ་བྱས་པ་ཞིག་ཡིན་འདུག གནས་ཚུལ་དེ་བྱུང་མ་ཐག་རྔ་པའི་ཕྱོགས་ཚང་མར་དམག་མི་འབོར་ཆེན་འགྲེམས་འཇོག་བྱས་ ཏེ་རྔ་པ་རྫོང་མཁར་ཡོངས་དང་ཀིརྟི་དགོན་པ་སོགས་ལ་བཀག་སྡོམ་ནན་མོ་བྱས་ཡོད་པས
གསུམ་ པའི་བཅུ་དྲུག་གི་རྗེས་ནས་ད་བར་རྔ་པ་རྫོང་ཐོག་གི་དྲ་རྒྱ་ཁང་ཚང་མ་སྒོ་བརྒྱབ་ ཡོད་པ་དང་། ཁ་པར་ནང་ནས་འཕྲིན་ཐུང་གཏོང་རྒྱུ་བཀག་འགོག་བྱས་པ་སོགས་མུ་མཐུད་ཡོད་འདུག དེ་བཞིན་དེ་རིང་ཡང་རྔ་པའི་ནང་ཁ་པར་གཏོང་ལེན་ལ་ཡང་དཀའ་ངལ་འཕྲད་བཞིན་ཡོད་ འདུག་པ་བཅས།

     ཨ་མདོ་རྔ་པ་ཀིརྟི་དགོན་གྱི་དགེ་འདུན་པ་བློ་བཟང་བརྩོན་འགྲུས། རང་ལོ་ ༤༦ ཡིན་པ་ཁོང་ལ་ཕྱི་ལོ་ ༢༠༡༡ ཟླ་ ༨ ཚེས་ ༢༩ ཉིན་རྔ་པ་འབྲིང་རིམ་མི་མང་ཁྲིམས་ཁང་ཟེར་བས་རྒྱལ་གཅེས་དཔའ་བོ་ཕུན་ཚོགས་ལགས་ ཀྱིས་རང་ལུས་མེར་སྲེག་བཏང་བའི་དོན་རྐྱེན་བྱུང་འཕྲལ་སྨན་ཁང་དུ་བསྟེན་གཏུགས་ བྱེད་རྒྱུ་བཀག་འགོག་བྱས་པའི་ཉེས་མིང་གཡོགས་ནས་ལོ་ ༡༡ གི་རིང་བཙོན་འཇུག་ཁྲིམས་ཐག་བཅད་འདུག

ཁོང་འདི་ལོའི་ཕྱི་ཟླ་ ༤ ཚེས་ ༡༢ ཉིན་འཛིན་བཟུང་བྱས་ཤིང༌། ད་བར་གནས་ཚུལ་གསལ་པོ་གཅིག་ཀྱང་ཤེས་རྟོགས་བྱུང་མེད་ནའང༌། འདི་ཟླའི་ཕྱི་ཚེས་ ༢༧ ཉིན་ཁོང་གི་ནང་མི་རྣམས་ལ་རྔ་པ་རང་སྐྱོང་ཁུལ་གྱི་ལྟེ་གནས་འབར་ཁམས་རྫོང་ལ་ ཡོང་དགོས་པའི་བརྡ་ལན་ཞིག་འབྱོར་ཡོད་པ་ལྟར་སོང་འདུག
དགེ་འདུན་པ་བློ་བཟང་བརྩོན་འགྲུས་ལགས་ནི་རྔ་པ་རྫོང་རྨེའུ་རུ་མའི་རུ་ཆེན་ གཉིས་པའི་ཇར་ཆེན་ཚང་ནས་ཡིན་ཞིང༌། རྒྱལ་གཅེས་དཔའ་བོ་ཕུན་ཚོགས་ལགས་ཀྱི་ཨ་ཁུ་དང་གྲྭ་ཤག་གི་དགེ་རྒན་ཡང་ཡིན། དེ་སྔོན་ཕྱི་ཟླ་ ༣ ཚེས་ ༢༠ ཉིན་ཁོང་དང་ཁོང་གི་དགེ་ཕྲུག རྒྱལ་གཅེས་དཔའ་བོ་ཕུན་ཚོགས་ལགས་ཀྱི་སྤུན་རྒན་པ་དར་རྒྱས་གཉིས་འཛིན་བཟུང་གིས་ ཉིན་ལྔའི་རིང་བཀག་སྐྱིལ་བྱས་རྗེས་གློད་བཀྲོལ་བཏང་བ་དང༌།

དེ་རྗེས་ཕྱི་ཟླ་ ༤ ཚེས་ ༡༢ ཉིན་བསྐྱར་དུ་ཁོང་གཉིས་ལྷན་དུ་འཛིན་བཟུང་བྱས་འདུག གནས་ཚུལ་ཡོང་ཁུངས་ནས་བཤད་པ་ལྟར་ན་རྔ་པ་རྫོང་གཅའ་ཞང་ཕྱུགས་ལས་འགབ་མའི་བློ་ བཀྲ་ཚང་གི་བློ་བཟང་བསྟན་འཛིན། གཅའ་ཞང་ནག་ཚང་མའི་པད་མ་ཚང་གི་བློ་བཟང་བསྟན་འཛིན་གཉིས་ཀྱི་ནང་མི་རྣམས་ལ་ཡང་ ཕྱི་ཚེས་ ༢༨ ཉིན་འབར་ཁམས་ལ་ཐོན་དགོས་པའི་བརྡ་ཐོ་འབྱོར་ཡོད་པ་ལྟར་སོང་འདུག་པས།  ཁོང་རྣམས་ལ་ཡང་ཁྲིམས་ཐག་གཅོད་རྒྱུ་ཡིན་པའི་ཚོད་དཔག་བྱེད་ཀྱིན་ཡོད་འདུག་པ་ བཅ།

 

     གནས་ཚུལ་འབྱོར་གསལ་ལ། ཟླ་འདིའི་ཕྱི་ཚེས་ ༥ ཉིན་རྔ་པ་ཀིརྟི་དགོན་པའི་རང་ལོ་ ༣༠ ཡིན་པའི་གྲྭ་ཚེ་ཁོ་དང་། རྒྱལ་གཅེས་དཔའ་བོ་ཕུན་ཚོགས་ལགས་ཀྱི་སྤུན་ཆེ་བ་རང་ལོ་ ༢༢ ཡིན་པའི་གྲྭ་བློ་བཟང་དར་རྒྱས་གཉིས་ལ་རྔ་པ་ཁུལ་གྱི་ལྟེ་གནས་འབར་ཁམས་ནས་ངལ་རྩོལ་སློབ་གཅུན་ཟེར་བའི་མིང་ཐོག་ནས་ལོ་ ༢ དང་ཟླ་ ༦ རེའི་དུས་བཀག་བཙོན་འཇུག་གི་ཁྲིམས་ཐག་བཅད་ཡོད་ཅིང་། ཀིརྟི་དགོན་པའི་རང་ལོ་ ༡༦ ཡིན་པའི་གྲྭ་རྡོ་རྗེ་ལ་ངལ་རྩོལ་སློབ་གཅུན་ཟེར་བའི་མིང་ཐོག་ནས་ལོ་ ༣ གྱི་དུས་བཀག་བཙོན་འཇུག་གི་ཐག་གཅོད་བྱས་ཡོད་འདུག ཁོང་གསུམ་ཀ་རྒྱལ་གཅེས་དཔའ་བོ་ཕུན་ཚོགས་དང་འབྲེལ་བ་ཡོད་པའི་ཉེས་མིང་ཁྲིམས་ཐག་བཅད་པ་ཞིག་ཡིན་འདུག

  རྒྱལ་གཅེས་དཔའ་བོ་ཕུན་ཚོགས་ལགས་ཀྱི་ཕ་མ་གཅིག་པའི་སྤུན་བློ་བཟང་དར་རྒྱས་འདི་ལོའི་ཕྱི་ཟླ་ ༤ ཚེས་ ༡༢ ཉིན་བསྐྱར་དུ་འཛིན་བཟུང་གིས་བཀག་ཉར་བྱས་པ་ཞིག་ཡིན་ཞིང༌། གཞན་གཉིས་ཀྱང་དུས་ཚེས་དེའི་སྔ་ཕྱི་ཤིག་ལ་འཛིན་བཟུང་བྱས་པ་ཡིན་འདུག

རྒྱ་གཞུང་གིས་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་སྤེལ་སྐབས་དགོན་པའི་གྲྭ་པ་མང་པོ་ཞིག་གནས་དབྱུང་བཏང་བའི་གསལ་བསྒྲགས་བྱས་ཡོད་པ་དང་། དེ་དག་ཕྱིར་ཀིརྟི་དགོན་པར་མ་ལོག་པར་གྲྭ་པ་ལོག་པ་ཡིན་ན་རྒྱ་སྒོར་ཁྲི་གཉིས་སྤྲོད་རྒྱུ་དང༌། རྒྱ་སྒོར་ཁྲི་ལྔ་ལོ་གསུམ་གྱི་རིང་གཡར་རྒྱུ་ཡིན་ཚུལ་བཤད་ཡོད་པ་དང༌། དེ་མིན་ད་ལོའི་ཕྱི་ཟླ་གསུམ་པའི་རྗེས་སུ་གྲྭ་ལོག་བྱས་པ་ཞིག་ཡིན་ཕྱིན་རྒྱ་སྒོར་ཁྲི་གཅིག་སྤྲོད་རྒྱུ་དང༌། ཁྲི་ལྔ་ལོ་གསུམ་གྱི་རིང་གཡར་རྒྱུ་ཡིན་ཞེས་བཤད་ཡོད་པར་མ་ཟད། རྐྱེན་གཞན་གྱིས་གྲྭ་ལོག་བྱས་ཡོད་པ་དག་ལའང་རྔན་པ་ཡིན་ཟེར་བའི་སྒོར་མོ་སྤྲད་ཡོད་ཀྱང་ལེན་མཁན་གཅིག་ཀྱང་བྱུང་ཡོད་མི་འདུག   

དེ་སྔོན་ཕྱི་ཟླ་ ༩ ཚེས་མགོ་ནས་ཉིན་བཅོ་ལྔའི་རིང་གྲྭ་པ་རྣམས་ལ་དགོན་པའི་ངོས་ནས་གུང་སེང་སྤྲད་ཡོད་ཅིང་དེང་སྐབས་གུང་སེང་གི་དུས་ཚོད་རྫོགས་ཡོད་ནའང༌། རྒྱ་གཞུང་གི་ལས་བྱེད་འབོར་ཆེན་ཞིག་ཡང་བསྐྱར་དགོན་པའི་ནང་ལ་འབྱོར་ནས་གྲྭ་པའི་ལག་ཁྱེར་ཟེར་བ་ཞིག་བཟོ་དགོས་ཚུལ་བརྗོད་ཡོད་སྟབས། དགོན་པའི་གྲྭ་པ་ཉུང་ཉུང་ཞིག་ལས་དགོན་ནང་དུ་ཡོང་མེད་པར་ས་ཕྱོགས་གང་སར་འཐོར་ནས་ཡོད་འདུག་པས། དགོན་པའི་ལས་སྣེ་རྣམས་ལ་རྒྱ་གཞུང་གིས་ཉིན་རྟག་པར་བསུན་གཙེར་བཟོ་བཞིན་ཡོད་འདུག

 

ཟླ་བཞི་བའི་ཕྱི་ཚེས་༢༡ཉིན་གྱི་བོད་ནང་གི་མཚན་མོའི་དུས་ཚོད་༩ཙམ་ནས་རྔ་པ་ཀིརྟི་དགོན་པའི་གྲྭ་ཤག་རེ་རེར་རྒྱ་གཞུང་གིས་དྲག་ཆས་དམག་དཔུང་དང་།ཉེན་རྟོག་པ།ཁྱད་ལས་དྲག་དམག་བཅས་འགྲེམས་འཇོག་བྱས་ཏེ་དགེ་འདུན་པ་༣༠༠ལྷག་འཛིན་བཟུང་གིས་སྤྱི་སྤྱོད་རླངས་འཁོར་ཆེ་བ་བཅུ་གྲངས་ཤིག་གི་ནང་བླུགས་ནས་ས་གནས་གཞན་ཞིག་ཏུ་ཁྱེར་ཡོད་འདུགས་གནས་ཡུལ་མི་ཚོས་གོ་ཐོས་བྱུང་བ་ལྟར་ན་གྲྭ་པ་རྣམས་རྔ་པ་རང་སྐྱོང་ཁུལ་གྱི་བུན་ཁྲོན་རྫོང་དང་།མོའོ་རྫོང་།བཀྲ་ཤིས་གླིང་རྫོང་བཅས་སུ་བཙན་ཁྲིད་བྱས་འདུ

    བཞུགས་སྒར་ཀིརྟིའི་བྱེས་པ་གྲྭ་ཚང་གི་བོད་གནས་འབྲེལ་མཐུད་པ་བློ་བཟང་ཡེ་ཤེས་དང་ཀ་ཉག་ཚེ་ལགས་གཉིས་ཀྱིས་གནས་ཚུལ་མཁོ་སྤྲོད་བྱས་པ་ལྟར་ན།མདང་དགོང་གྲྭ་པ་རྣམས་འཛིན་བཟུང་བཙན་ཁྲིད་བྱ་སྐབས།དེ་སྔ་ནས་དགོན་པའི་ཉེ་འདབས་སུ་ཉིན་མཚན་གཉིས་ཀར་དགེ་འདུན་པ་རྣམས་སྲུང་སྐྱོབ་ཆེད་བསྡད་ཡོད་པའི་ལོ་ན་རྒན་རྒོན་གཙོས་མང་ཚོགས་༢༠༠ལྷག་ཡོད་པ་རྣམས་ཀྱིས་བཀག་འགོག་བྱས་པར་གཅར་རྡུང་དྲག་པོ་བཏང་སྟེ།དགུང་ལོ་༦༠ཡིན་པའི་མཐའ་བ་གོང་མའི་དོན་ཁོ་དང་།དགུང་ལོ་༦༥ཡིན་པའི་གཅའ་ཞང་ནག་ཚང་མའི་ར་ཁོ་ཚང་གི་ཤེར་སྐྱིད་གཉིས་རྐྱེན་ལམ་དུ་བཏང་ཡོད་པར་མ་ཟད། རྒན་མོ་ཞིག་གི་རྐང་པའང་དུམ་བུ་གསུམ་དུ་བཅག་པ་སོགས་མི་མང་པོའི་རྐང་ལག་བཅག་ཡོད་པའི་གནས་ཚུལ་བྱུང་ཡོད་པ་དང་།སྐབས་དེར་མང་ཚོགས་ནས་སྐད་ཤུགས་ཆེན་པོས་ངུ་འབོད་བྱས་པར་ཁ་ནང་དུ་རས་སོགས་བརྫངས་ཏེ་བཙན་གྱིས་སྐད་བརྒྱག་བཅུག་མེད་པ་རེད།རྗེས་སུ་མི་མང་རྣམས་དོ་སྐྱེལ་རླངས་འཁོར་བཞིའི་ནང་ལ་བླུགས་ནས་གཉིས་དམག་སྒར་ནང་ཁྱེར་ཡོད་པ་དང་།གཉིས་རས་བོང་ཞེས་པའི་དུར་སའི་ནང་ཁྱེར་ཡོད་འདུགཕྱི་ཚེས་༢༢ཉིན་མི་ཕལ་ཆེ་བ་གློད་ཡོད་ནའང་ལོ་གཞོན་པ་ཁག་ཅིག་མུ་མཐུད་དུ་བཀག་ཉར་བྱས་ཡོད་པ་དང་།ནགས་ལས་བློ་བཟང་ཚང་གི་བུ་མོ་ཞིག་ཀྱང་མདང་དགོང་བཙན་འཁྲིད་བྱས་ཏེ་གར་སོང་ཆ་མེད་དུ་གྱུར་ཡོད་འདུག

     ཕྱི་ཚེས་༢༡ཉིན་གྱི་ཕྱི་དྲོའི་བོད་ནང་གི་ཆུ་ཚོད་༤ཙམ་ནས་བཟུང་།ཆུ་ཚོད་༢༤རིང་རྔ་པ་རྫོང་ཁོངས་ཀྱི་ཁ་པར་རིགས་ཚང་མའི་བརྡ་རྟགས་རྩ་བ་ནས་མེད་པ་ཆགས་ཡོད་པ་རེད།དེ་རིང་ཕྱི་ཚེས་༢༢ཉིན་གྱི་བོད་ནང་གི་ཕྱི་དྲོའི་ཆུ་ཚོད་༥ཙམ་ལ་སླར་ཡང་དགོན་པའི་ནང་སྤྱི་སྤྱོད་རླངས་འཁོར་ཆེ་བ་༥སླེབས་ཡོད་པ་དང་།རླངས་འཁོར་དེ་དག་གི་ཨང་གྲངས་དང་།རྩུབ་གཡས་གཡོན་གྱི་ཡི་གེ་ཚང་མ་གབ་ནས་མི་མཐོང་བར་བཟོས་ཡོད་འདུག ས་གནས་མང་ཚོགས་ནས་དོ་དགོང་ཡང་གྲྭ་པ་མང་པོ་ཞིག་འཛིན་བཟུང་བྱས་ཡོང་བར་བློ་འཚབ་གནང་བཞིན་ཡོད་འདུག

 

 

ཟླ་གསུམ་པའི་ཚེ་༡༦་ཆུ་ཚོད་༤ ཡས་མས་ཙམ་ལ་བོད་མདོ་སྨད་རྔ་པ་རྫོང་རྨེའུ་རུ་མ་ནས་ཡིན་ཞིང་། ད་ལྟ་རྔ་པ་ཀིརྟི་དགོན་དུ་ཡོད་པའི་གྲྭ་ཕུན་ཚོགས་ཀྱིས་ཀིརྟི་དགོན་པའི་ཉེ་འདབས་ཀྱི་ཁྲོམ་གཞུང་ནས། བོད་ལ་འགྲོ་བ་མིའི་ཐོབ་ཐང་དགོས་ཞེས་འབོད་ཚིག་སྒྲོག་གིན་རང་ལུས་མེ་རུ་སྒྲོན་ཏེ། རྒྱ་ནག་གཞུང་ལ་ངོ་རྒོལ་སྐད་འབོད་བྱས་ཡོད་ཅིང་། ས་གནས་རྒྱ་ནག་ཉེན་རྟོག་པས་མེ་གསོད་ཁུལ་གྱིས་ཁོང་ལ་རྡུང་རྡེག་བཏང་སྟེ། མེ་གསོད་ཐུབ་ཙམ་བྱུང་རྗེས་ཉེན་རྟོག་པས་ཁོང་རླངས་འཁོར་ནང་བཅུགས་ཏེ་བཙན་འཁྲིད་བྱ་རྩིས་བྱས་པར། དེར་ཡོད་གྲྭ་བ་དང་མི་མང་གིས་སོ་སོའི་སྲོག་གཏོང་དགོས་ཀྱང་སྐུ་ལ་མེར་བསྲེགས་ཐེབས་ཏེ་འཚོ་གནས་ཐུབ་མིན་གྱི་བར་མཚམས་ན་ལྷག་ཡོད་པའི་གྲྭ་ཕུན་ཚོགས་ལགས་རྒྱ་ལག་ཏུ་གི་མིན་ཞེས་ཉེན་རྟོག་པའི་ལག་ནས་ཕྱིར་འཕྲོག་ཏེ་སྲུང་སྐྱོབ་བྱས་སྟབས། ཉེན་རྟོག་མི་སྣས་གྲྭ་པ་དང་མང་ཚོགས་ཚོར་བཅར་རྡུང་བྱས་ཏེ་མི་མང་པོར་རྨས་སྐྱོན་བཟོས་ཡོད་འདུག དོན་རྐྱེན་དེ་ཀིརྟི་དགོན་པས་གྲྭ་མང་གིས་ཐོས་ཏེ་ཤོར་ཡོང་སྐབས། དགོན་པའི་གླིང་མདུན་ནས་མང་ཚོགས་ཀྱིས་དགེ་འདུན་པ་མང་པོ་ཞིག་གི་ཚེ་སྲོག་ལ་ཉེན་ཁ་ཡོང་རྒྱུར་དོགས་ཏེ་གྲྭ་མང་ལ་ཞུ་བ་ཞུས་ཏེ་བཀག་ཡོད་འདུག

 

    དེ་ནས་གྲྭ་ཕུན་ཚོགས་ལགས་ཐོག་མར་ཕྱིར་ཁོང་གི་གཟིམས་ཤག་ཏུ་ཁྱེར་རྗེས། རྫོང་ས་གནས་སྨན་ཁང་ཞིག་ཏུ་མྱུར་སྐྱོབ་བྱ་བར་ཁྱེར་ཡོད་ཅིང་། སྐབས་དེར་གྲྭ་བ་དང་མི་མང་ཆིག་སྟོང་༡༠༠༠ ལྷག་འདུ་འཛོམས་ཀྱིས། རྒྱ་གཞུང་ལ་ངོ་རྒོལ་སྐད་འབོད་ཐོག་དགོན་པའི་ཉེ་འདབས་ཀྱི་ཁྲོམ་གཞུང་ནས་གོམ་བཀྲོད་བྱས་ཏེ། སྤྱི་ལེ་ཕྱེད་ཀ་ཙམ་གྱི་རིང་འབྱོར་སྐབས་རྒྱ་ནག་གི་དྲག་ཆས་ཉེན་རྟོག་དམག་དཔུང་བསླེབས་ཏེ་ལྕགས་དབྱུག་གློག་རྒྱུག་སོགས་ཀྱིས་མང་ཚོགས་ལ་རྡུང་རྡེག་ཚ་ནན་བཏང་སྟེ་གོམ་བགྲོད་བྱེད་བཅུགས་མེད་པར་མ་ཟད།  མི་མང་པོ་ཞིག་འཛིན་བཟུང་བཀག་ཉར་བྱས་ཡོད་འདུག

དེ་རྗེས་གྲྭ་པ་དང་མི་མང་མང་པོ་མཉམ་འཛོམས་ཐོག་འཛིན་བཟུང་བྱས་པ་རྣམས་གློད་གྲོལ་མ་བྱས་པར་ཕྱིར་མི་ལོག་ཅེས་བརྗོད་དེ། མ་ཎི་བགྲང་ཞིང་མཆོད་མེ་སྒྲོན་ནས་སྡོད་སྐབས། དགོན་པའི་ཆོས་ལུགས་དོ་དམ་ཁང་གི་འགན་འཛིན་དང་དགེ་སྐུལ་སོགས་ཡོང་སྟེ། ས་གནས་རྒྱ་གཞུང་ལ་འབྲེལ་བ་བྱས་ཏེ་དགེ་འདུན་པ་རྣམས་གློད་གྲོལ་གཏོང་རྒྱུ་བྱས་ཡོད་སྐོར་དང་། གྲྭ་པ་དང་མི་མང་རྣམས་ཡར་འགྲོ་རོགས་ཞེས་ནན་སྐུལ་བྱས་ཡོད་ཀྱང་། གྲྭ་པ་དང་མི་མང་དགོན་པའི་གླིང་དཀྱིལ་གྱི་འདུ་ཁང་མདུན་ཐང་དུ་འཛོམས་ནས་འཛིན་བཟུང་བྱས་པའི་གྲྭ་པ་རྣམས་གློད་གྲོལ་མ་བྱས་བར་ཕྱིར་མི་ལོག་ཟེར་ནས། བོད་ནང་གི་མཚན་མོའི་དུས་ཚོད་༡༡ ཡས་མས་བར་བསྡད་ཡོད་པ་དང་། སྐབས་དེར་དགོན་པའི་དགེ་འདུན་པ་བདུན་གློད་གྲོལ་བྱས་ཡོད་འདུག སྐབས་དེར་དགོན་པའི་ཆོས་ལུགས་དོ་དམ་ཁང་གི་འགན་འཛིན་དང་དགེ་སྐུལ་སོགས་འབྲེལ་ཡོད་ཉེན་རྟོག་ལས་ཁུངས་སུ་བཅར་ཏེ། ཀིརྟི་དགོན་པ་མིན་པའི་དགོན་པ་གཞན་ཁག་གི་གྲྭ་བ་འཛིན་བཟུང་བཀག་ཉར་བྱས་ཡོད་པ་རྣམས་ཀྱང་གློད་གྲོལ་གཏོང་དགོས་པའི་འབོད་སྐུལ་ཞུས་ཡོད་ཀྱང་། འབྲེལ་ཡོད་དགོན་པ་ཁག་གི་འགན་ལེན་མེད་པར་གཏོང་གི་མིན་ཚུལ་བརྗོད་ཡོད་འདུག

ྋགོང་ས་མཆོག་དབུ་བཞུགས་ཀྱིས་མཆོད་འབུལ་སྨོན་ལམ་རྒྱ་ཆེ་གནང་བ།

༄༅། །དེ་རིང་ཞོགས་པའི་ཆུ་ཚོད་ ༨ དང་སྐར་མ་ ༣༠ ཐོག་བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ྋགོང་ས་མཆོག་དབུ་བཞུགས་འོག་བཙན་བྱོལ་བོད་གཞུང་མང་གཙོའི་ཀ་བ་གསུམ་གྱི་མཛད་གཙོ་རྣམ་པ་དང་། བཀའ་ཟུར་དང་སྤྱི་འཐུས་རྒྱུན་ལས་རྣམ་པ། བཞུགས་སྒར་དུ་གནས་འཁོད་དགོན་སྡེ་ཁག་གི་གྲྭ་བཙུན་དང་། དེ་བཞིན་གཞུང་འབྲེལ་མ་ཡིན་པའི་ཚོགས་པ་ཁག་གི་ཚོགས་མི་དང་ངྷ་ས་མི་མང་བཅས་འདུ་འཛོམས་ཐོག་ཉེ་ཆར་ཟླ་ ༣ ཚེས་ ༡༦ ནས་བཟུང་མདོ་སྨད་རྔ་པ་ཀི་རྟིའི་དགོན་དུ་ས་གནས་ཉེན་རྟོག་པ་དང་དྲག་ཆས་དམག་དཔུང་གིས་དྲག་གནོན་དམ་བསྒྲགས་ཚབས་ཆེ་བྱས་ཏེ་དགེ་འདུན་པ་དང་མི་མང་ལ་སེམས་ཚབས་དང་འཇིགས་སྣང་ཆེན་པོ་བཟོ་བཞིན་པར་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་གཙོས་དགེ་འདུན་པ་དང་སེར་སྐྱ་མི་མང་ཡོངས་ཀྱིས་དུས་ཡུན་ཆུ་ཚོད་གཅིག་ལྷ་ཙམ་རིང་མཆོད་འབུལ་སྨོན་ལམ་རྒྱ་ཆེ་གསུངས་ཡོད།   ཀིརྟི་དགོན་པའི་ཉིན་མོ་སྲུང་བརྩི། ༄༅། །ཕྱི་ལོ་ ༢༠༡༡ ཟླ་ ༥ ཚེས་ ༡ ཉིན་རྒྱ་གར་བོད་དོན་རྒྱབ་སྐྱོར་ཚོགས་པ་ (Core Group For Tibetan cause) ཞེས་པའི་ཚོགས་མི་ཁག་གཅིག་དང་ལྷན། བཙན་བྱོལ་བོད་མི་མང་སྤྱི་འཐུས་ཚོགས་གཞོན་རྒྱ་རི་སྒྲོལ་མ་མཆོག་གིས་དབུས་བོད་མི་མང་སྤྱི་འཐུས་འབའ་བ་སྐལ་བཟང་རྒྱལ་མཚན་ལགས་དང་། སློབ་དཔོན་བསོད་ནམས་བསྟན་འཕེལ་ལགས། སྤྱི་འཐུས་ཆོས་སྐྱོང་དབང་ཕྱུག་ལགས་བཅས་ལྷན་འཛོམས་ཐོག་རྒྱ་ནག་གཞུང་གིས་རྔ་པ་ཀིརྟི་དགོན་པར་སྡུག་སྦྱོང་ཚད་མེད་བཏང་དང་གཏོང་བཞིན་པའི་སྐོར་བགྲོ་གླེང་གནང་ཡོད། སྐབས་དེར་སྐུ་ཞབས་ཨེན་ཀེ་ཏྲིལ་ཀ་(Dr.N.K Trilka) ལགས་དང། རྒྱ་གར་གྱི་བློན་ཆེན་ཟུར་པ་སྐུ་ཞབས་ཨེས་པི་མ་ལ་ཝི་ཡ་ (Mr. S.P. Malaviya) ལགས་གཉིས་ཀྱིས་རྒྱ་གར་དབུས་གཞུང་གི་བློན་ཆེན་ཟུར་པ་ (Ex Cabinet Minister) སྐུ་ཞབས་ཇ་སི་ཝན་སིན་ཧ་ (Jaswant Sinha) ལགས་ལ་བོད་ནང་གི་གནས་སྟངས་ཇེ་སྡུག་ཏུ་འགྲོ་བཞིན་པའི་སྐོར་འགྲེལ་བརྗོད་གནང་རྗེས་ཁོང་གིས་བོད་ནང་གི་གནས་སྟངས་ཐོག་བློ་འཚབ་དང་རྒྱབ་སྐྱོར་ཡོད་སྐོར་གསུངས་ཡོད། ཕྱོགས་མཚུངས་རྒྱ་གར་གྱི་བོད་དོན་རྒྱབ་སྐྱོར་བ་རྣམས་ནས་རྒྱ༌གར་གྱི་ས་ཕྱོགས་གང་སར་ཀི་རྟིའི་དགོན་པའི་ཉིན་མོ་ (A Day of Kirti Monastery) ཞེས་སྲུང་བརྩི་ཞུ་རྒྱུ་ཡིན་འདུག་པ་བཅས།

བཞུགས་སྒར་རྡ་ས་ནས་རྒྱལ་ས་ལྡི་ལི་བར་གྱི་གོམ་བགྲོད།

    ཀིརྟི་བྱེས་པ་གྲྭ་ཚང་དང་ངྷ་ས་མདོ་སྨད་དབུས་ས་རྒྱུན་ལས་ཐུན་མོང་གི་གོ་སྒྲིག་འོག ཚེས་༢༦སྔ་དྲོའི་ཆུ་ཚོད་ ༡༠ པའི་སྟེང་བཞུགས་སྒར་ངྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ཀིརྟི་དགོན་པའི་དགེ་འདུན་པ་ ༡༠༠ ཙམ་གྱིས་བཞུགས་སྒར་ངྷ་རམ་ས་ལ་རྒྱ་གར་རྒྱལ་ས་ལྡི་ལི་བར་ཞི་བའི་གོམ་བགྲོད་ཀྱི་ལས་འགུལ་ཞིག་མགོ་འཛུགས་བྱས་ཡོད་ཅིང་། ལས་འགུལ་དབུ་འཛུགས་ཀྱི་མཛད་སྒོའི་སྟེང་བཙན་བྱོལ་བོད་གཞུང་གི་བཀའ་བློན་ཁྲིི་པ་ཟམ་གདོང་རིན་པོ་ཆེ་དང་བཀའ་ཟུར་ཀིརྟི་རིན་པོི་རྣམ་གཉིས་ཀྱིས་གཙོས་པའི་སྤྱི་འཐུས་བགྲེས་གཞོན་དང་རྒྱུན་ལས། ངྷ་སར་གནས་སྡོད་བོད་རིགས་སེར་སྐྱ་མང་ཚོགས་དང་ཕྱི་རྒྱལ་བ་བཅས་མི་མང་སྟོང་ཕྲག་ལྷག་འདུ་འཛོམས་བྱུང་ཡོད། མཛད་སྒོ་མ་འཚོགས་གོང་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་མཆོག་དབུ་བཞུགས་ཐོག་ཉེ་ཆར་མདོ་སྨད་རྔ་པ་ཁུལ་དུ་བསད་རྨས་བྱུང་བ་རྣམས་ཀྱི་ཆེད་བསྔོ་བ་སྨོན་ལམ་རྒྱས་པ་ཞིག་གསུངས་ཡོད།  

 

སྐབས་དེར་ཀིརྟི་བྱེས་པ་གྲྭ་ཚང་གིས་ཐེངས་འདིའི་ལས་འགུལ་གྱི་དགོས་འདུན་ཁག་སྒྲོག་སྦྱོང་བྱས་པའི་ནང་། ངྷ་སར་རྟེན་གཞི་བྱས་པའི་ཀིརྟི་བྱེས་པ་གྲྭ་ཚང་དང་རྡོར་གླིང་སུ་ཁེ་ཀིརྟི་དགོན་གཉིས་ཐུན་མོང་ཐོག སངས་རྒྱས་བསྟན་པ་དང་དེ་འཛིན་ཆོས་བྱེད་ཀྱི་དགེ་འདུན་པའི་སྡེ་དང་། ལྷག་པར་དུ་རྔ་པ་ཀིརྟི་དགོན་པ་ཆགས་འཇིག་གི་མཚམས་སུ་སྐྱོབ་ཆེད། ངྷ་ས་ནས་ལྡི་ལི་བར་སེར་སྦྲེངས་སྙན་སྐུལ་སྨོན་ལམ་བྱེད་ཀྱི་ཡོད་ལ། སེར་སྦྲེངས་སྙན་སྐུལ་གྱི་སྨོན་ལམ་དང་ཆབས་ཅིག་རྒྱལ་སྤྱི་དང་རྒྱ་གཞུང་བཅས་ལ་དགོས་འདུན་དོན་ཚན་གསུམ་འབོད་སྐུལ་ཞུ་བཞིན་ཡོད། ཅེས་བཀོད་འདུག

དགོས་འདུན་དོན་མཚན་གསུམ་ལས་དང་པོ། ཞི་བདེ་དང་དྲང་བདེན་ལ་དགའ་བའི་འཛམ་གླིང་མི་མང་དང་སྲིད་གཞུང་། གྲོས་ཚོགས། གཞུང་འབྲེལ་མིན་པའི་ཚོགས་པ་དང་། ཁྱད་པར་དུ། སྟོན་པ་དང་བསྟན་པ་གཅིག་པའི་འཛམ་གླིང་ཤར་ནུབ་ཀྱི་ནང་པ་ཡོངས་ཀྱིས་རྔ་པ་ཀིརྟི་དགོན་པ་རྒྱ་ནག་གི་དྲག་གནོན་འོག་མྱུར་དུ་སྐྱོབ་ཐབས་ཀྱི་ཛ་དྲག་ལས་འགུལ་ཞིག་སྤེལ་རྒྱུར་འབོད་སྐུལ་ཞུ་བཞིན་ཡོད། གཉིས་པ། ཀུན་གཟིགས་པཎ་ཆེན་ཆུང་སྲིད་རིན་པོ་ཆེས་གཙོས་རྒྱ་ནག་གི་བཙོན་འོག་ཏུ་ཡོད་པའི་བོད་མི་ཆབ་སྲིད་བཙོན་པ་དང་། རྔ་པ་ཀིརྟི་དགོན་གྱི་གྲྭ་བློ་བཟང་བརྩོན་འགྲུས་དང་དར་རྒྱས་སོགས་རྔ་པ་ཁུལ་གྱི་བོད་མི་བཙོན་པ་རྣམས་གང་མགྱོགས་ཀློད་གྲོལ་དགོས། གསུམ་པ། རྒྱ་གཞུང་གིས་བོད་མི་ཚོར་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་། ཆོས་དད་རང་དབང་ཐོབ་ཐང་ཡོངས་སུ་སྤྲད་དེ། རིས་མེད་དགོན་སྡེ་ཁག་གི་ཆོས་ལུགས་བྱེད་སྒོ་ཁག་གུ་ཡངས་དགོས། ཞེས་བསྟན་འདུག  

 

མཇུག་ཏུ་བཀའ་ཁྲི་ཟམ་གདོང་རིན་པོ་ཆེ་མཆོག་གིས་གསུང་བཤད་གནང་དོན། ད་ལྟ་རྔ་པ་ཀིརྟི་དགོན་དུ་དགེ་འདུན་པ་བརྒྱ་ཕྲག་མང་པོ་འཛིན་བཟུང་བཙོན་འཇུག་བྱས་ཏེ། དགོན་པ་ཆགས་འཇིག་གི་གནས་སུ་ལྷུང་ཡོད་ལ། བོད་གཞུང་དང་གཞུང་འབྲེལ་མིན་པའི་ཚོགས་པ་ཁག མང་ཚོགས་བཅས་ཀྱིས་མཉམ་འབྲེལ་རྒྱལ་ཚོགས་གཙོས་པའི་རྒྱལ་སྤྱིའི་སྤྱི་ཚོགས་སུ་འབོད་སྐུལ་རིམ་པར་ཞུས་ཡོད་ཀྱང་དེ་ཙམ་གྱི་ནུས་པ་ཐོན་མེད། གལ་སྲིད་མུ་མཐུད་འདི་ལྟར་ཕྱིན་པ་ཡིན་ན། ཀིརྟི་དགོན་པ་གཙོས་པའི་བོད་ནང་གི་དགེ་འདུན་པའི་སྡེ་རྣམས་རྩ་མེད་དུ་འགྲོ་རྒྱུའི་ཉེན་ཁ་འདུག ཅེས་དང་།

དེ་རིང་ཀིརྟི་བྱེས་པ་གྲྭ་ཚང་གི་དགེ་འདུན་པ་བརྒྱ་སྐོར་ཞིག་གིས་ངྷ་ས་ནས་ལྡི་ལི་བར་གོམ་བགྲོད་གནང་གི་ཡོད་པ་རེད། ང་ཚོའི་འཚེ་མེད་ཞི་བའི་ལས་འགུལ་ལ་ནུས་པ་ཐོན་དང་མི་ཐོན། ལམ་འགྲོ་རྒྱུག་དང་མི་རྒྱུག་ཟེར་བ་དེ། ང་ཚོའི་ལུས་ངག་ཡིད་གསུམ་གྱི་འཚེ་བ་མེད་པའི་ལྟ་སྤྱོད་ཅི་ཙམ་གྱིས་བརྟན་པོ་ཡོད་མེད་ལ་རག་ལས་ཡོད། བོད་ཀྱི་དྲང་བདེན་འཐབ་རྩོད་དེ། མངོན་གསལ་དོད་པོས་འཚེ་བ་མེད་པ་བྱས་ཏེ་ལོ་བཞི་བཅུ་ཞེ་གྲངས་ཤིག་འགྲོ་བཞིན་ཡོད་ཀྱང་། ང་ཚོའི་བསམ་བློ་ནང་གི་འཚེ་བ་སྤངས་ཐུབ་ཀྱི་ཡོད་མེད་དེ། ད་ལྟ་ཡང་ཐེ་ཚོམ་ཀྱི་གནས་སྟངས་ཤིག་ཆགས་ཡོད། ཅེས་གསུངས་བྱུང་།

 

བཀའ་ཁྲི་མཆོག་གིས་མུ་མཐུད་དུ་ལས་འགུལ་དེ་འཚེ་བ་མེད་པ་ཡོང་དགོས་པའི་སྐོར་གསུངས་དོན། དེ་རིང་དམིགས་བསལ་རབ་བྱུང་དགེ་འདུན་གྱི་སྡེ་ཞིག་གིས་ལས་འགུལ་སྤེལ་གྱི་ཡོད་དུས། འཚེ་བ་མེད་པའི་ལས་འགུལ་དེ་དོན་དམ་གྱི་འཚེ་བ་མེད་པ་ཞིག་ཡོང་རྒྱུར་ཐབས་ཤེས་གནང་རོགས་ཞེས་འབོད་སྐུལ་ཞུ་ཡི་ཡོད། གལ་སྲིད། དོན་དམ་གྱི་འཚེ་བ་མེད་པ་ཞིག་བྱུང་ན། ལས་འགུལ་དེར་ནུས་པ་འཐོན་རྒྱུ་ནི་ཐེ་ཚོམ་མེད་པ་ཞིག་རེད། བཙན་གནོན་དང་སྡུག་སྦྱོང་མནར་གཅོད་གཏོང་མཁན་རྒྱ་ནག་གི་དབུ་ཁྲིད་ཚོ་དང་། ཁོང་ཚོའི་བཀོད་འདོམས་འོག་ཡོད་པའི་འཚེ་བའི་བྱ་སྤྱོད་སྤེལ་མཁན་གྱི་མི་དེ་ཚོ། རང་རྒྱལ་གཞན་ཕམ་གྱི་ཉོན་མོངས་གིས་གཞན་དབང་དུ་སོང་ཡོད་སྟབས། ང་ཚོས་མི་དེ་ཚོར་ཞེ་སྡང་དང་ཁོང་ཁྲོའི་རྣམ་པ་སྤུ་ཙམ་ཡང་མེད་ཐོག སྙིང་རྗེའི་སེམས་ཀྱིས་ཁོང་ཚོའི་བྱས་ཉེས་ལ་ངོ་རྒོལ་བྱ་ཐུབ་ན། ཏན་ཏན་ནུས་པ་ཞིག་འཐོན་ཡོང་གི་རེད། ཅེས་གསུངས་བྱུང་།  

ཁོང་གིས་མུ་མཐུད་དེ་གསུངས་དོན། བར་ལམ་ཞིག་ནས་ཞི་བའི་གོམ་བགྲོད་བྱེད་མཁན་ཚང་མས། ༧གོང་ས་མཆོག་གིས་སྲོལ་གཏོད་གནང་བའི་བྱང་ཆུབ་སེམས་མཆོག་གི་སྨོན་ལམ་འདོན་རྒྱུའི་ལུགས་སྲོལ་ཞིག་ཆགས་ཡོད་ལ། དེར་ཁྱེད་ཚོས་ཀྱང་ཐུགས་ཞིབ་གནང་ཡོད་རྒྱུ་རེད། བྱང་ཆུབ་སེམས་མཆོག་འདོན་བཞིན་དུ་ཁོང་ཁྲོའི་བློ་སྐྱེ་པ་ཡིན་ན། ཁ་བཤད་ལག་ལེན་མ་ཐུབ་པ་ཞིག་རེད་ལ། ལྷག་པར་དུ་ཕྱིའི་རྣམ་འགྱུར་འཚེ་བ་ཡོད་མེད་གཉིས་ཀ་བྱུང་ན། དེ་ནི་ཡ་མཚན་གང་ཡང་ཆགས་ཀྱི་མེད་དུས། ལུས་ངག་ཡིད་གསུམ་འཚེ་མེད་ཞི་བའི་ལྟ་སྤྱོད་དང་མཐུན་པ་ཞིག་དགོས་པ་རེད། དེ་ལྟར་བྱུང་ན། གོམ་པ་གཅིག་སྤོས་ཀྱང་རླབས་ཆེན་གྲུབ་འབྲས་དང་སྤྱི་མཐུན་བསོད་ནམས་གསོག་རྒྱུར་ཕན་གྱི་རེད། ཅེས་གསུངས།

 

བྱེས་བཞུགས་དགེ་འདུན་པའི་ཞི་རྒོལ།

    ཚེས་༢༦་སྔ་དྲོའི་ཆུ་ཚོད་ ༡༠ སྟེང་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་གོ་སྒྲིག་འོག རྒྱ་གར་ལྷོ་ཕྱོགས་ཁར་ནཱ་ཊ་ཀ་མངའ་སྡེའི་མེའི་སོར་གྲོང་ཁྱེར་ནང་དགེ་འདུན་པ་ཁོ་ནས་གྲུབ་པའི་ཞི་བའི་གོམ་བགྲོད་ཀྱི་ལས་འགུལ་ཞིག་སྤེལ་ཡོད་འདུག་ཅིང་། དེ་ནི་ཉིན་འདི་འགར་རྒྱ་ནག་གཞུང་གིས་རྔ་པ་ཀིརྟི་དགོན་གྲོང་གཉིས་ལ་དམ་དྲག་ཤུགས་ཆེན་བྱེད་ཀྱིན་ཡོད་པ་དང་། ལྷག་པར་དུ་བོད་བརྒྱུད་ནང་བསྟན་ཆོས་ལུགས་རྩ་མེད་བཟོ་བའི་སྲིད་ཇུས་གཏིང་ནག་ཅིག་ལག་བསྟར་བྱེད་ཀྱིན་ཡོད་པ་དེར་ངོ་རྒོལ་བྱས་པ་ཞིག་ཡིན་འདུག

ལས་འགུལ་དེའི་ནང་སེ་ར་བྱེས་སྨད་གཉིས་དང་བཀྲ་ཤིས་ལྷུན་པོ། རྣམ་གྲོལ་གླིང་། ས་སྐྱ་དགོན་པ། རྒྱུད་སྨད་བཅས་དགེ་འདུན་པ་ཞལ་གྲངས་༤༠༠ ལྷག་མཉམ་ཞུགས་ཀྱིས་སྐུ་ལ་ཆོས་གོས་སེར་པོ་མནབས་ཤིང་། ཞལ་ནས་ཚད་མེད་ཡོན་ཏན་སྐྱོར། ཕྱག་ཏུ་རྒྱལ་གཅེས་དཔའ་བོ་ཕུན་ཚོགས་ལགས་ཀྱི་སྐུ་པར་དང་། འཕྲེད་དར་སྣ་ཚོགས་འཕྱར་བཞིན་མེའི་སོར་མི་མང་སྤྱི་གླིང་ནས་རྫོང་དཔོན་ལས་ཁུངས་ཀྱི་སྒོ་མདུན་བར་ཞི་བའི་རྔམ་སྟོན་ཁྲོམ་སྐོར་བྱས་ཡོད་པ་མ་ཟད། ཀིརྟི་དགོན་པ་དམག་གིས་བསྐོར་བ་འཕྲལ་དུ་མཚམས་འཇོག་དགོས་པ་དང་། ཀིརྟི་དགོན་དུ་ཆོས་ལུགས་ཀྱི་བྱེད་སྒོ་ཁག་འཕྲལ་དུ་སླར་གསོ་བྱ་དགོས་པ། དགེ་འདུན་པ་རྣམས་ལ་འགྲོ་སྡོད་རང་དབང་སྤྲོད་དགོས་པ། རྔ་བའི་སྐྱ་སེར་འཛིན་བཟུང་བྱས་པ་རྣམས་འཕྲལ་དུ་ཀློད་གྲོལ་གཏོང་དགོས་པ་བཅས་ཀྱི་དགོས་འདུན་དོན་ཚན་བཞི་བཏོན་ཏེ། མེའི་སོར་རྫོང་དཔོན་བརྒྱུད་རྒྱ་གར་གྱི་སྲིད་བློན་མཆོག་གི་མཚན་ཐོག་ལ་ཕུལ་ཡོད་འདུག

ལས་འགུལ་མཇུག་སྡོམ་སྟེང་གངས་ལྗོངས་རང་བདེན་རྩོད་ལེན་མཐུན་ཚོགས་ཀྱི་ཚོགས་གཙོ་རྭ་རྒྱ་བློ་བཟང་དཔལ་ལྡན་ལགས་ཀྱིས་ཐེངས་འདིའི་ལས་འགུལ་གྱི་དགོས་དམིགས་དང་འབྲེལ་ཏེ་གཏམ་བཤད་གནང་དོན། རྒྱ་ནག་གཞུང་གིས་སྡུག་སྦྱོང་མནར་གཅོད་ཇི་ལྟར་བཏང་ཡང་། བོད་གཞིས་བྱེས་གཉིས་ཀྱི་སེམས་པ་གཅིག་ཏུ་སྒྲིལ་ཡོད་པ་དང་། བོད་ཆོལ་ཁ་གསུམ་གྱི་སྟོབས་ཤུགས་གཅིག་ཏུ་སྤུངས་ཏེ། རྒྱ་ནག་སྲིད་དབང་སྒེར་འཛིན་ལ་ཁ་གཏད་གཅོག་གི་ཡོད་པས་ལས་སླ་མོ་ཞིག་མིན་པ་ཤེས་གསལ་རེད། ད་སྐབས་རྒྱ་ནག་ཐེ་པའི་སྲིད་དབང་སྒེར་སྤྱོད་པའི་གཞུང་དེ་དག་འཛམ་བུ་གླིང་འདི་ན་སྡོད་སའི་གནས་མེད་པ་ཆགས་བཞིན་ཡོད་སྟབས། བྱ་སྤྱོད་དེ་དག་ནི་ཁོ་ཚོའི་མཐའ་མཇུག་གི་འཕག་འཚག་བརྒྱབ་པ་ཞིག་ལ་ངོས་འཛིན་བྱེད་ཀྱིན་ཡོད།

 

ཐེངས་འདིའི་རྔ་པ་ཀིརྟི་དགོན་པའི་གནས་སྟངས་ཚུད་པའི་བོད་ཀྱི་ཆབ་སྲིད་པ་དང་ཤེས་ཡོན་པ་ཁེ་ལས་པ་ཁོར་ཡུག་སྲུང་སྐྱོབ་པ་བཅས་མི་མང་པོ་ཞིག་རྒྱ་ནག་གི་བཙོན་ཁང་དུ་ཡོད། འདི་ཛ་དྲག་གི་གནས་སྟངས་ཤིག་ཆགས་ཡོད་པ་རེད། ཡིན་ན་ཡང་རྒྱ་ནག་སྲིད་དབང་སྒེར་འཛིན་གཞུང་གིས་ཡག་སྡུག་གང་བྱས་པ་རྣམས་རྐྱེན་ངན་གྲོགས་ཤར་ཟེར་བ་ལྟར། ང་ཚོས་སྟོབས་དང་ནུས་པ་གོང་འཕེལ་དུ་འགྲོ་པའི་ཐབས་ལམ་ཞིག་ཏུ་བསྒྱུར་དགོས། ཁོ་ཚོས་རྒྱུན་དུ་བོད་ནང་ཞི་འཇམ་ཡིན་ཚུལ་དང་ཁ་བྲལ་ཉུང་ཤས་ཡིན་ཚུལ་ཀྱི་སྐྱག་རྫུན་དེ་དག་ད་ཆར་རྐུབ་རྡོལ་བ་རེད། འཛམ་གླིང་ནང་གི་མི་རིགས་གཅིག་ལ་མི་རིགས་གཞན་ཞིག་གིས་གཉའ་གནོན་བྱས་ཏེ་རྫོགས་སོང་པ་ཞིག་མེད་ལ། ལོ་ངོ་སྟོང་ཕྲག་ལ་མི་རབས་ནས་མི་རབས་བརྒྱུད་འཐབ་རྩོད་བྱས་ནས་རང་བཙན་རག་པའི་ལོ་རྒྱུའི་འཛམ་གླིང་འདིར་ཡོད་བསྡད་པ་ཞིག་རེད། ང་ཚོ་གཞིས་བྱེས་གཉིས་སུ་གྱེས་ཡོན་ན་ཡང་ང་ཚོ་ལ་དགའ་བའི་འཛམ་གླིང་གི་རྒྱལ་ཁབ་དང་ཚོགས་སྡེ་མི་མང་བཅས་ཡོད་པར་མ་ཟད། ༸གོང་ས་མཆོག་ལྟ་བུའི་འཛམ་གླིང་ན་མཆོག་ཏུ་གྱུར་བའི་དབུ་ཁྲིད་ཡོད་པ་རེད། ད་སྐབས་ཀིརྟི་དགོན་པའི་ནང་རྒྱ་ནག་གིས་རྒྱལ་གཅེས་ཆོས་གཅེས་ཀྱི་སློབ་གསོ་སྤེལ་ཏེ། སོ་སོའི་རྒྱལ་ཁབ་ལ་དགའ་ཞེན་དང་བརྩི་བཀུར་ཞུ་དགོས་པ་དང་། རྒྱལ་ཁབ་ཀྱི་ཆེད་དུ་སོ་སོའི་དགེ་རྒན་དང་རྩ་བའི་བླ་མ། ༧གོང་ས་མཆོག་བཅས་ལ་སྐྱོན་བརྗོད་བྱ་དགོས་པ་དེ་རེད། དེ་འདྲ་མ་བྱུང་ན་གྲྭ་པ་ཚུལ་ལྡན་ཞིག་ཡོང་ཐབས་མེད་པ་སོགས་རྒྱལ་ཁབ་དང་དེའི་ཁྲིམས་ལ་གཙི་མཐོང་བྱ་དགོས་པའི་སློབ་གསོ་སྤྲོད་ཀྱི་ཡོད། ཅེས་དང་།

ཁོང་གིས་མུ་མཐུད་དུ་གསུངས་དོན། རྒྱལ་གཅེས་ཆོས་གཅེས་ཀྱི་སློབ་གསོའི་ལས་འགུལ་འདི་སྔོན་མ་བརྒྱད་ཅུ་གྱ་གྲངས་ནང་དབུས་ཀྱི་གདན་ས་ཁག་ཏུ་སྤེལ་ཡོད་ལ། རྒྱལ་གཅེས་ཆོས་གཅེས་ཀྱི་ལས་འགུལ་ལ་ངོས་ལེན་མི་བྱེད་མཁན་ཚོ་དགོན་པ་ནས་སྡོད་མི་ཆོག་པའི་གནས་སྟངས་ཆགས་སྟབས། གྲྭ་པ་མང་པོ་དགོན་པ་ནས་འཐོན་དགོས་པ་དང་རང་ཤི་རྒྱག་དགོས་པའི་གནས་སྟངས་ཀྱང་བྱུང་ཡོད། སྤྱིར་བཏང་བཤད་ན་འདི་གནས་ཚུལ་གསར་བ་གང་ཡང་མ་རེད། དུས་རབ་གོང་མའི་དུས་དཀྱིལ་ཙམ་ནས་རྒྱ་ནག་དམར་གཞུང་གིས་ང་ཚོའི་དགོན་པ་སྟོང་ཕྲག་དྲུག་རྩ་གཏོར་བཏང་ཞིང་། བོད་མི་ས་ཡ་གཅིག་ལྷག་དུས་མིན་རྐྱེན་ལམ་དུ་བཏང་ཡོད། འོན་ཀྱང་སྐབས་རེད་རྒྱ་གཞུང་གིས་གང་བཤད་ལས་ང་ཚོས་དཔང་རྟགས་གསལ་བོ་བསྟན་ཐུབ་མེད། ཡིན་ན་ཡང་ད་སྐབས་གནས་ཚུལ་འདི་འདྲ་འཕྲད་ཡོང་སྐབས་བོད་ནང་གི་བོད་མི་ཚོས་ཕྱི་ལོགས་ན་ཡོད་པའི་བོད་མི་ཚོར་རེ་བ་ཞིག་རྒྱག་གི་ཡོད་པ་ནི། བོད་ནང་གི་ཛ་དྲག་གནས་སྟངས་རྣམས་རྒྱལ་སྤྱིའི་ཁྱོན་ལ་གསལ་བཤད་དང་འབོད་སྐུལ་ཞུས་ཏེ། བོད་ནང་གི་གནས་སྟངས་ཡག་ཏུ་ཡོང་ཐབས་བྱ་རྒྱུ་དེ་རེད། དེར་བརྟེན་ང་ཚོས་ནུས་ཤུགས་གང་ཡོད་བཏོན་ཏེ། དཔང་རྟགས་དང་བཅས་འཛམ་གླིང་ལ་གསལ་བཤད་བྱ་རྒྱུ་ཧ་ཅང་གལ་ཆེན་ཆགས་ཡོད། ང་ཚོའི་ཚོགས་པའི་ངོས་ནས་ཀྱང་རྒྱ་གར་གཞུང་དང་མཉམ་འབྲེལ་རྒྱལ་ཚོགས། རྒྱ་གཞུང་བཅས་ལ་སྙན་ཞུ་འབུལ་རྒྱུ་ཡིན། ཞེས་གསུངས་འདུག

 

ཛ་དྲག་གནས་ཚུལ་བསྡུས་པ།

 

     ཕྱི་ཚེས་ ༡༡ ཉིན་ཕ་ཡུལ་རྨེའུ་རུ་མའི་རུ་ཆེན་གཉིས་པའི་རྔ་བ་ཚང་གི་གྲྭ་བློ་བཟང་དར་རྒྱས་རང་ལོ་ ༣༡ ཡིན་པ་ཀིརྟི་དགོན་ནས་འཛིན་བཟུང་གིས་བཀག་ཉར་བྱས་ཡོད་པ་དང་། ཕྱི་ཚེས་ ༡༢ ཉིན་སྦྱོང་བརྡར་སྤྲད་པའི་དམག་ཁྱི་མང་ཚོགས་ནང་གློད་དེ་ལོ་ན་ ༦༠ ཡོལ་བའི་ཨ་མ་རྒན་མོ་གཉིས་ལ་རྨས་སྐྱོན་ལྕི་མོ་བཟོས་ཏེ་ད་ཆ་རྫོང་སྨན་ཁང་དུ་ཉལ་ཡོད་འདུག ཉིན་དེར་མི་མང་གིས། གལ་སྲིད་དགེ་འདུན་པ་རྣམས་ཀྱིས་ཁྲིམས་དང་འགལ་བའི་ཉེས་པ་དངོས་ཡོད་བསགས་པ་ཡིན་ན་ང་ཚོས་གང་ཡང་བརྗོད་ཀྱི་མེད་ཀྱང་། ད་ལྟ་ཉེས་པ་གང་ཡང་མེད་པའི་དགེ་འདུན་པ་རྣམས་བཙོན་ཁང་དུ་ཁྱེར་དགོས་པ་ཡིན་ན་ང་ཚོས་རང་སྲོག་འབེན་ལ་བཞག་ནས་སྲུང་སྐྱོབ་བྱེད་རྒྱུ་ཡིན་ཚུལ་བརྗོད་སྐབས། དེར་ཡོད་ཉེན་རྟོག་མི་སྣ་སོགས་ཀྱིས་ཤི་ཐུབ་མཁན་ཚོས་འཛུབ་ཐེལ་རྒྱག་དགོས་ཚུལ་བཤད་པར། མི་སུམ་བརྒྱ་ལྷག་གིས་གྲྭ་པ་རྣམས་ཀྱི་ཆེད་དུ་ཤི་ཐུབ་པའི་འཛུབ་ཐེལ་བརྒྱབ་ཡོད་པ་དང་། དེ་དུས་མི་མང་གིས་འཚང་ཁ་བརྒྱབ་པར་བརྟེན་མཚམས་བཞག་ཡོད་འདུག

ཕྱི་ཚེས་ ༡༣ ཉིན། དགོན་པའི་ནང་ཡོད་པའི་ལས་དོན་རུ་ཁག་གིས། ཁོ་ཚོའི་ལས་ཀ་མཇུག་མ་རྫོགས་བར་དུ་གནད་དོན་ག་རེ་ལ་ཐུག་ན་ཡང་གྲྭ་པ་གཅིག་ཀྱང་ཕྱི་ལ་ཐོན་མི་ཆོག་ཚུལ་དང་། ལས་མཇུག་མགྱོགས་པོར་རྫོགས་མིན་གྲྭ་པ་ཚོས་སློབ་གསོ་དང་ལེན་བྱེད་མིན་ལ་རག་ལས་ཚུལ་བརྗོད་ཡོད་འདུག

ཕྱི་ཚེས་ ༡༤ ཉིན་རྔ་པ་རང་སྐྱོང་ཁུལ་གྱི་འཐབ་ཕྱོགས་གཅིག་གྱུར་ཁང་གི་འགོ་ཁྲིད་དང་དགེ་འདུན་པ་ཉུང་ཤས་ལྷན་དུ་ཚོགས་འདུ་འཚོགས་ཡོད་པ་དང་། སྐབས་དེར་དགེ་འདུན་པ་རྣམས་ཀྱིས་ས་གནས་ས་ཐོག་གི་དངོས་ཡོད་ཀྱི་དཀའ་ངལ་ག་རེ་ཡིན་མིན་འགྲེལ་བརྗོད་དང་། ལྷག་པར་དུ་རྔ་པ་ཀིརྟིའི་དགོན་གྱི་སློབ་གྲྭ་སྒོ་བརྒྱབ་པ་སོགས་ཀྱི་གནད་དོན་མང་པོ་ཞིག་གླེང་ཡང་ཚུར་ལན་འདེབས་གང་ཡང་བྱས་མི་འདུག

ཕྱི་ཚེས་ ༡༥ ཉིན་དེར་དགེ་འདུན་པ་ཁག་ཅིག་འཛིན་བཟུང་གིས་བཀག་ཉར་བྱས་པའི་གནས་ཚུལ་ཐོན་ཡང་མིང་དང་ས་གནས་སོགས་ཞིབ་ཕྲའི་གནས་ཚུལ་ཤེས་རྟོགས་མ་བྱུང་།

ཕྱི་ཚེས་ ༡༥ དང་ ༡༦ ཉིན་སོ་སོར་རྔ་པ་རྫོང་ཐོག་ལ་ཡོད་པའི་གཞུང་གི་ལས་བྱེད་ཡོངས་རྫོགས་དང་། ཐ་ན་སློབ་གྲྭའི་དགེ་རྒན་ཚུན་ཆད་ཀིརྟི་དགོན་དུ་དགེ་འདུན་པ་རྣམས་ལ་རྒྱལ་གཅེས་ཆོས་གཅེས་ཀྱི་སློབ་གསོ་ཟེར་བ་སྤེལ་བཞིན་པའི་ནང་མཉམ་ཞུགས་བྱེད་དགོས་ཀྱི་ཡོད་པ་མ་ཟད། མཛོད་དགེ་རྫོང་གི་ལས་བྱེད་པ་མང་པོ་ཞིག་ཀྱང་རྒྱབ་དཔུང་ལྟ་བུར་དགོན་པའི་ནང་སླེབས་ཡོད་འདུག

རྔ་པ་རང་སྐྱོང་ཁུལ་གྱི་འཐབ་ཕྱོགས་གཅིག་གྱུར་ཁང་གི་འགན་འཛིན་གྱིས་གྲྭ་དམངས་བསྐོངས་ཏེ། དགོན་པ་གཏོར་དང་མི་གཏོར། ཆོས་སྒོ་རྒྱག་དང་མི་རྒྱག་ང་ཚོ་ལ་སྐད་ཆ་གང་ཡང་མེད། དེ་ནི་ཁྱེད་རང་ཚོའི་རྣམ་འགྱུར་ལ་རག་ལས་པ་ཞིག་ཡིན་པས་ཁྱེད་རང་ཚོས་གདམ་ག་ཡིན་ཚུལ་འཇིགས་སྐུལ་བྱས་ཡོད་ལ། དགོན་པའི་དགེ་འདུན་པ་ཁག་ཅིག་གིས་ཕྱི་ཕྱོགས་ལ་གནས་ཚུལ་འགྲེལ་བརྗོད་བྱེད་ཀྱིན་ཡོད་པས། དེ་ཚོ་རང་དགར་མི་འཇོག་ཚུལ་ནན་བརྗོད་བྱས་ཡོད་པ་དང་།

དེ་བཞིན་ཕྱི་ལོ་ ༢༠༠༨ ནས་ལོ་ད་བར་ཀིརྟི་དགོན་པའི་དགེ་འདུན་པ་ཚོས་ངོ་རྒོལ་ལས་འགུལ་རྒྱུན་མཐུད་བྱས་ཡོད་པས། རྔ་པའི་སྤྱི་ཚོགས་ཁྱོན་ཡོངས་ཀྱི་བདེ་འཇགས་ཀྱི་གནས་སྟངས་ལ་གཏོར་བཤིག་ཚབས་ཆེན་བཏང་ཡོད་པ་དང་། ད་ལྟ་ད་དུང་ལས་འགུལ་རྒྱུན་མཐུད་འདོད་པའི་དམིགས་ཡུལ་གསལ་པོ་ཡིན་པ་སོགས་བརྗོད་འདུག

ད་ཆ་དགོན་པའི་ནང་ལ་ཉེན་རྟོག་པ་དང་དམག་མི་མཉམ་འབྲེལ་གྱིས་དམ་བསྒྲགས་དང་ལྟ་སྲུང་བྱེད་མུས་ཡིན་པ་དང་། དགོང་མོའི་དུས་ཚོད་བརྒྱད་པའི་རྗེས་མི་གཅིག་ཀྱང་གྲྭ་ཤག་གི་ཕྱི་ལ་ཐོན་མི་ཆོག་པའི་བཙན་བཀའ་བཏང་འདུག་ལ། དེའི་རྗེས་གླིང་བར་ལ་ལྟ་སྲུང་བྱེད་མཁན་གྱི་དམག་མི་སོགས་ལ་ཐུག་ན་རྡུང་རྡེག་དྲག་པོ་གཏོང་གི་ཡོད་འདུག

གྲྭ་པ་བདུན་ཅན་གྱི་གྲྭ་ཤག་ཅིག་གི་ནང་བཞེས་ལག་རྩ་བ་ནས་མ་རག་པར་ཉིན་གསུམ་རིང་ལྟོགས་སྐོམ་མྱོང་དགོས་བྱུང་ཡོད་འདུག་ལ། ཕྱིས་སུ་གྲྭ་པ་ཚོས་བཞེས་ལག་ཅུང་ཙམ་རེ་བསྡུ་རུབ་བྱས་ཏེ་ཁོང་ཚོ་ལ་སྤྲད་ཡོད་འདུག

ཕྱི་ཚེས་ ༡༥ མཚན་མོ་དགོན་པའི་གླིང་བར་ལ་ལྟ་སྲུང་བྱས་ནས་ཡོད་པའི་དྲག་ཆས་དམག་མི་དང་ཉེན་རྟོག་མི་སྣ་སྐོར་ཞིག་གིས་གྲྭ་དཔལ་ཁོ་ལགས་ཀྱི་གྲྭ་ཤག་གི་ར་བའི་ངོས་སུ་རླངས་འཁོར་བཏང་ནས་ར་བ་གཏོར་ཡོད་འདུག

ཕྱི་ཟླ་ ༣ ཚེས་ ༢༠ ཙམ་ནས་དགོན་པའི་ནང་ལོགས་ལ་ཡོད་པའི་སྨན་ཁང་གི་སྒོ་གཏན་རྒྱག་བྱས་ཏེ་དགེ་འདུན་པ་རྣམས་ལ་རྒྱུན་ལྡན་གྱི་སྨན་བཅོས་མཐུན་རྐྱེན་གཅིག་ཀྱང་མ་རག་པའི་དཀའ་ངལ་ཤུགས་ཆེ་ཡོང་གི་ཡོད་འདུག  སྨན་ཁང་དེ་ནི་སྨན་པ་གྲྭ་ཚང་གིས་གཉེར་བཞིན་པའི་བོད་ལུགས་དང་ཕྱི་ལུགས་གཉིས་ཀྱི་སྨན་བཅོས་མཐུན་རྐྱེན་ཡོད་པ་ཞིག་ཡིན།

རྒྱུན་དུ་གྲྭ་ཤག་ལ་གང་བྱུང་གིས་སྔོག་བཤེར་བྱེད་ཀྱིན་ཡོད་པར་མ་ཟད། གྲྭ་ཤག་ལ་འཛུལ་སྐབས་གང་ཡིན་འདི་ཡིན་མེད་པའི་མི་ཞིག་གི་མིང་ནས་བཟུང་སྟེ་མི་དེ་འདིར་ཡོད་མེད་འདྲི་བ་དང་། མི་དེ་འདྲ་ཞིག་གཏན་ནས་མེད་ཚུལ་བརྗོད་པར་དྲང་བཤད་བྱས་མ་སོང་ཚུལ་བརྗོད་དེ་གཅར་རྡུང་གཏོང་བ་དང་། བཅའ་དངོས་མང་པོ་རྐུ་འཕྲོག་གི་གནས་ཚུལ་ཡང་ཡོང་གི་ཡོད་འདུག

ཕྱི་ཟླ་ ༣ ཚེས་ ༡༦ ནས་ད་བར་དགོན་པའི་དགེ་འདུན་པ་བརྒྱ་ལྷག་གར་སོང་ཆ་མེད་དུ་གྱུར་ཡོད་པ་དགོན་པའི་ཕྱི་ནང་མང་པོར་རྩད་གཅོད་བྱས་ཡོད་ཀྱང་ད་བར་ཤེས་རྟོགས་བྱུང་མེད།

ཕྱི་ཟླ་ ༣ ཚེས་ ༡༦ ཉིན་རྔ་པ་ཀིརྟིའི་དགོན་གྱི་གྲྭ་རྒྱལ་གཅེས་དཔའ་བོ་ཕུན་ཚོགས་ལགས་ཀྱིས་རང་ལུས་མེར་སྒྲོན་པའི་དོན་དག་བྱུང་མ་ཐག སྐབས་དེར་ཟི་ལིང་དུ་ཡོད་པའི་རྩོམ་པ་པོ་སྒོ་ཤེས་རབ་ལགས་ཕྱིར་རྔ་པ་རུ་ཡོང་བའི་ལམ་དུ་ཞུགས་ཡོད་ཀྱང་། དེ་ནས་བཟུང་ད་བར་གར་སོང་ཆ་མེད་ཀྱི་གནས་སུ་གྱུར་འདུག་ཅིང་། འབྲེལ་ཡོད་དགོན་གྲོང་ཚོས་ལམ་བར་ནས་རྒྱ་གཞུང་གིས་འཛིན་བཟུང་བཀག་ཉར་བྱས་པར་ངོས་འཛིན་བྱེད་ཀྱི་ཡོད་འདུག