ཆོས་བརྒྱུད་སྤྱི་འཐུས་མཁོ་མིན་གྱི་གནད་དོན་གཙོ་བོ། སྤྱིར་བོད་ལ་ཆོས་སྲིད་ཟུང་འབྲེལ་གྱི་ལམ་ལུགས་གལ་ཆེ་བའི་སྐོར་ངས་བཤད་པ་དང་བྲིས་པ་གཉིས་ཀ་ཡོད། གཙོ་བོ་ཆོས་བརྒྱུད་སྤྱི་འཐུས་ཡོད་མེད་ཙམ་གྱིས་ང་ཚོའི་ཆོས་སྲིད་ཟུང་འབྲེལ་གྱི་རྣམ་གཞག་འཇིག་པར་འགྱུར་མིན་དང་དགེ་སྐྱོན་གང་ཆེ་ལ་ཞིབ་ཏུ་བསམས་པ་ལས། ངས་བྱུང་དང་འབྱུང་བཞིན་པའི་ཉོག་དྲ་ཙམ་པོ་བ་འདི་དག་གཙོ་བོར་འཛིན་གྱིན་མེད་ལ། འདི་ཆོས་བརྒྱུད་སྤྱི་འཐུས་གཅིག་པུའི་སྐྱོན་ཞིག་ཡིན་པ་དེ་བས་ཀྱང་བསམས་མ་མྱོང། ཚང་མས་ཤེས་གསལ་ལྟར་མི་རབས་གསར་བ་སྔ་རྗེས་དུ་མ་ཞིག་གིས་བོད་ཀྱི་ཆོས་སྲིད་ཟུང་འབྲེལ་ལམ་ལུགས་ལ་སྐྱོན་བརྗོད་ཤུགས་ཆེན་བྱས་དང་བྱེད་ཀྱིན་ཡོད། བོད་ལ་བྱུང་བའི་བྱས་ཉེས་ཚང་མ་དེས་མ་འགྲིགས་པར་འདོད་ཡོད། དེ་བས་ང་ཚོས་ཆོས་སྲིད་ཟུང་འབྲེལ་གྱི་ལམ་ལུགས་གསར་བ་འདིས་ད་ལྟ་དང་མ་འོངས་པར་བོད་ཀྱི་སྤྱི་ཚོགས་ལ་དགེ་མཚན་གསར་བ་རེ་འདོན་ཐུབ་པའི་བདེན་དཔང་བྱེད་དགོས་ཀྱི་ཡོད། འོན་ཀྱང་དེང་སང་སྤྱིར་གྲྭ་བའི་མཐོང་དམའ་རུ་འགྲོ་བཞིན་ཡོད་ལ་ལྷག་པར་བླ་སྤྲུལ་རིགས་ལའང་དད་པ་ལོག་གིན་ཡོད། ཆོས་ལུགས་མི་སྣའི་གནས་བབ་འདི་འདྲའི་སྐབས་སུ་ཚད་མཐོའི་གྲོས་ཚོགས་ར་བའི་ནང་དུ་ཆོས་བརྒྱུད་སྤྱི་འཐུས་རྣམ་པས་རྒྱ་ཆེ་བའི་དད་ལྡན་མི་དམངས་ལ་ཤུགས་རྐྱེན་བཟང་པོ་ཞིག་འཇོག་རྐྱུ་ཅི་བས་ཀྱང་གལ་ཆེ་བར་མཐོང་གིན་ཡོད་མོད། འདི་ཐུབ་ཀྱིན་མི་མེད་པས་ཆོས་བརྒྱུད་སྤྱི་འཐུས་དེ་ཡོད་པ་ལས་མེད་ན་བཟང་བའི་སྣང་ཚུལ་འདི་རིགས་བྱུང་དང་འབྱུང་བཞིན་པ་ཞིག་རེད། དེ་བས་ང་ཚོ་མུ་མཐུད་ལམ་ལུགས་འདིའི་ཐོག་སོང་ན་བོད་ཀྱི་ནང་ཆོས་དང་དེ་འཛིན་གནང་མཁན་གྱི་སྐྱེས་བུ་དམ་པས་གཙོས་དགོན་སྡེ་ཁག་ལ་ཡི་རང་དད་མོས་ཡོང་བ་ཞིག་ཏུ་བསྒྱུར་ཐུབ་རྒྱུ་རེད་དམ། ཡང་ན་ཇེ་སྡུག་ཏུ་འགྱུར་རྒྱུ་རེད། གལ་ཏེ་མི་རབས་གསར་བའི་ཆོས་ལུགས་ཀྱི་དད་འདུན་བརླགས་ན་དེའི་མཇུག་འབྲས་ཇི་ལྟ་བུ་ཞིག་ཏུ་འགྱུར་རྒྱུར་ངེས་པར་ཐུགས་བསམ་བཞེས་དགོས། ངས་ནི་ཧ་ཅང་གི་ཚབས་ཆེན་པོ་ཞིག་མཐོང་གིན་འདུག སྤྱིར་བཏང་གི་བླ་སྤྲུལ་ཞིག་དང་གྲྭ་བ་འགའ་རེའི་ཚུལ་མིན་སྤྱོད་པས་ཀྱང་གཞོན་སྐྱེས་ཚོར་ཤུགས་རྐྱེན་ཅི་ཙམ་འཇོག་གིན་འདུག ཆོས་བརྒྱུད་སྤྱི་འཐུས་རྣམ་པ་ནི་བོད་ཀྱི་དགོན་སྡེ་ཡོངས་ཀྱི་ཚབ་མཚོན་གྱི་མི་སྣ་ཞིག་ཆགས་ཀྱིན་ཡོད་པས་ཁོང་ཚོའི་གནང་སྟངས་ཀྱིས་ཤུགས་རྐྱེན་བཟང་ངན་གཞན་ལས་ལྷག་པ་འཇོག་གིན་ཡོད། གནད་དོན་འདི་འདྲ་ཞིག་ལ་ཐུག་ཡོད་པས་འདིའི་ཐད་ལ་གཡུང་དྲུང་བོན་བཅས་པའི་ཆོས་བརྒྱུད་ཁག་གི་དབུ་ཁྲིད་རྣམ་པས་གཙོས་དགེ་འདུན་པའི་སྡེས་ཐུགས་བསམ་ལེགས་པོ་ཞིག་བཞེས་དགོས་པ་མ་ཟད། ཆེད་དུ་དམིགས་བསལ་ཚོགས་འདུ་བསྐོང་ནས་ཆོས་ལུགས་འཛིན་སྐྱོང་ཐོག་ལ་ཅི་དགེའི་བཀའ་མོལ་གནང་འོས་པར་མཐོང། ངས་འདི་ལྟར་བསམ་བློ་གཏོང་ཁུལ་བྱེད་ཀྱིན་ཡོད། ངས་ཇོ་ནང་བར་སྤྱི་འཐུས་དགོས་ཚུལ་ཅང་བཤད་མ་མྱོང། ཡིན་ན་ཡང་ཇོ་ནང་བའི་མཁན་པོ་སོགས་ཀྱིས་ལོ་ནས་ལོ་མཐུད་དེ་གྲོས་ཚོགས་ར་བའི་སྒོར་ཕེབས་ནས་ཡིག་ངག་གཉིས་ཐོག་ནས་རེ་བསྐུལ་ཞུས་ཀྱིན་ཡོད་པས་ང་ཚོས་དོ་སྣང་མ་བྱས་ས་མི་འགྲོ་ལ། ཁོང་ཚོས་རྩོད་བཞིན་པ་དེ་འོས་དང་མི་འོས་ཀྱི་ཐག་གཅོད་ཅིག་ཀྱང་གནང་དགོས་པ་རེད་དེ། དེ་དོན་ས་སྐྱ་བའི་ནང་གི་ཉོག་དྲ་ཞིག་ཡིན་ཚུལ་དང། ཆོས་དོན་ལྷན་ཁང་དང་ཆོས་བརྒྱུད་ཁག་གི་ཚོགས་ཆེན་བཅས་ཀྱིས་ཐག་གཅོད་དགོས་པ་ཞིག་ལ་བརྩིས་ནས་ང་ཚོའི་གྲོས་ཚོགས་ལ་འགན་མེད་པ་འདྲ་བོ་ཞིག་ཆགས་བསྡད་ཡོད་པ་དོན་དངོས་རེད། འདི་ཐད་ལ་ཆོས་བརྒྱུད་སྤྱི་འཐུས་ཚོས་དམིགས་བསལ་འགན་ཞིག་བཞེས་ནས་གནང་རྒྱུ་ཅང་མེད་པའམ་མི་ཤེས་པ་ཞིག་རེད། ཡང་ན་ཆོས་ལུགས་ཐད་ཀྱི་གནད་དོན་འདི་རིགས་ཐད་ལ་ཆོས་བརྒྱུད་སྤྱི་འཐུས་རྣམ་པར་དམིགས་བསལ་ཐག་གཅོད་ཀྱི་སྐུ་དབང་ཞིག་ཁྲིམས་ཐོག་ནས་བཟོ་དགོས་ཀྱི་འདུག དེའི་མཚུངས་ཆོས་བརྒྱུད་སྤྱི་འཐུས་འདེམས་ཕྱོགས་ལ་བསམ་འཆར་ཡོང་གིན་ཡོད། འོས་འཕེན་གྱི་ཐོབ་ཐང་གཉིས་ཡོད་པ་དེ་རེད། གང་ལྟར་ལེགས་བཅོས་ཤིག་བྱེད་དགོས་པ་ཆགས་ཡོད་པས་ཇི་ལྟར་བྱེད་མིན་དེ་ང་ཚོས་བསམ་བློ་གཏོང་དགོས་ངེས་རེད། དེ་སྔོན་ནས་གྲོས་ཚོགས་ནང་ལ་གྲོས་འཆར་ཞིག་འདོན་རྩིས་བྱས་མོད། གཅིག་ནས་དུས་ལ་མ་རན་པ་ཞིག་དང་གཉིས་ནས་གནད་དོན་འདི་མི་དམངས་ཀྱིས་གླེང་འོས་པ་ཞིག་ཏུ་མཐོང་ནས་ད་བར་ངག་ནས་བཤད་པ་ལས་ལག་ནས་བྲིས་མེད། དེ་གཅིག་ཡིན། གཉིས་ནས། ཆོལ་ཁའི་སྤྱི་འཐུས་མང་ཉུང་སྐོར་རེད། འདིའི་དགོས་པ་གཙོ་བོ་དེ་སྔོན་ཁ་ཐོར་ཡ་ཐོར་གྱི་བོད་རིགས་ཡོངས་སུ་རྫོགས་པ་ཁྱིམ་གཅིག་གི་མི་ཡིན་པ་དང་ཕྱིར་ཁྱིམ་གཅིག་ལ་འདུ་བའི་ཆེད་ཡིན་པས་བཙན་བྱོལ་བའི་ཆོལ་ཁོངས་ཀྱི་མི་གྲངས་མང་ཉུང་ལ་མ་བལྟས་པ་རེད། འོན་ཀྱང་འདིའི་ཐོག་ནས་ཀྱང་བསམ་ཚུལ་མང་པོ་ཞིག་བྱུང་དང་འབྱུང་བཞིན་པ་རེད། དེ་རིང་འདི་ཡང་ཞོར་དུ་གླེང་དགོས་བྱུང་སོང། གཅིག་ནས་བོད་པ་ཚང་གི་ཁྱིམ་ཚང་ཆེན་པོ་མཚོན་ཕྱིར་ཆོལ་གསུམ་སྤྱི་འཐུས་ངེས་པར་མཁོ། གཉིས་ནས་བཙན་བྱོལ་བོད་མིའི་ཆོལ་ཁོངས་མི་འབོར་གི་མང་ཉུང་ཐོག་ནས་འཐུས་མིའི་མང་ཉུང་བཏོད་ཆོག འདི་ལ་ང་མོས་མཐུན་ཡོད། དེང་སང་གི་དབུས་གཙང་ཆོལ་ཁོངས་ལ་ས་ཁུལ་མང་ཐོག་མི་གྲངས་ཀྱང་མང། དེ་བས་སྤྱི་འཐུས་ཀྱང་མང་ཤོས་ཡིན་དགོས།་ དེ་ནས་མདོ་སྟོད། ཉུང་ཤོས་་མདོ་སྨད་ལོས་ཡིན། དེ་དག་གི་ཐོག་ལ་རྒྱལ་ཁོངས་གཞན་གྱི་བོད་མིའི་སྐུ་ཚབ་འཐུས་མི་གང་འཚམ་དགོས། དེ་དག་གི་ནང་ལ་སྐྱ་སེར་ཕོ་མོ་སུ་ཡང་ཡོང་ཆོག དེ་རིང་ནས་ངས་བོད་ཀྱི་དུས་བབ་དྲ་ཐོག་ལ་དེབ་སྐྱེལ་བྱས་ཡོད་པས་ང་ཚོས་ཁ་བརྡ་ཡང་ཡང་བྱེད་ཆོག བདེ་མོ།༢༠༡༠།༧།༣